24-ժամյա նստացույցին կհաջորդի Մաշտոցի պուրակի կրպակների ապամոնտաժումը: Այսօր «Առաջին լրատվական»-ի հետ զրույցում նման տեղեկություն տրամադրեց բնապահպան-ակտվիվիստ Ռուզաննա Գրիգորյանը`խոսելով Մաշտոցի պուրակում ակտիվիստների հետագա գործողությունների մասին:
Նա նշեց, որ այսօր նստացույց սկսելու որոշումը կայացվել է իգական սեռի ակտիվիստների կողմից, և վստահաբար նստացույցի օրերին նրանք կլինեն պուրակում:
«Եթե այս նստացույցի արդյունքում մեր նպատակին չհասնենք, ավելի կտրուկ գործողությունների պետք է դիմել, ինչպես հայտարարել էինք մարտի 8-ին Մաշտոցի պուրակում տեղի ունեցած ակցիայի ժամանակ: Քաղաքապետարանին պաշտոնապես որևէ տեղեկություն չի գնացել, քանի որ այս ընթացքում բազմաթիվ անգամներ ուղղել ենք և պատասխան չի եղել»,- նշեց Ռուզաննա Գրիգորյանը`հավելելով, որ կոշտ գործողություններ ասելով նկատի ունի կրպակների ապամոնտաժումը: Նրա խոսքով` կրպակները կապամոնտաժվեն, բայց թե ինչ մեխանիզմով, չգիտի, դեռ հստակ որոշված չէ: Նշենք, որ 24-ժամյա նստացույցը պաշտոնապես մեկնարկել է այսօր և շարունակվելու է մինչև ուրբաթ օրը:
Հիշեցնենք, որ «Մենք ենք այս քաղաքի տերը», «Մեր քաղաքը», «Թռչկան» քաղաքացիական նախաձեռնություններն արդեն 31 օր է, ինչ պայքարում են Մաշտոցի պուրակում տեղադրված կրպակների ապամոնտաժման համար: Բազմիցս այս նպատակով ակտիվիստները դիմել են քաղաքապետարանին, սակայն ապարդյուն, հարցը բնապահպան-ակտիվիստների համար դեռևս օրակարգային է: Մաշտոցի պուրակի «պաշտպաններին» են միացել մի շարք քաղաքական, հասարակական և մշակութային գործիչներ:
