ՀՀ նախկին վարչապետ, Knightsbridge ընկերությունների խմբի ղեկավար Արմեն Սարգսյանը և ՌԴ Լենինգրադի մարզի նահանգապետ Վալերի Սերդյուկովն այսօր համագործակցության հուշագիր կստորագրեն Նովոլադոժյան ջրագծի վերաբերյալ, որի ընդհանուր արժեքը կկազմի 50 մլրդ ռուբլի:
Ինչպես հաղորդում է «Մեդիամաքս» գործակալությունը, այդ մասին գրում է «Դելովոյ Էքսպրես» թերթը:
Թերթը նշում է, որ այդ նախագծի համար մարզը 4 տարի ներդրող էր փնտրում:
«Դելովոյ Էքսպրես»-ը գրում է, որ Knightsbridge-ն աշխատում է համաշխարհային առաջատար ներդրումային և ապահովագրական ընկերությունների հետ, որոնց թվում են Goldman Sachs-ը, Merrill Lynch-ը, Credit Suisse-ը և HSBC-ն, նրա ներկայացուցչությունները տեղակայված են Վիեննայում, Լոնդոնում, Փարիզում, Մոսկվայում, Բուդապեշտում, Վարշավայում, Կիևում և Ալմաթիում:
«Արմեն Սարգսյանը համաշխարհային մասշտաբի լուրջ ձեռնարկատեր է: Նա ինտելեկտուալ է, ում հարգում է աշխարհի բիզնես- էլիտան: Արմեն Սարգսյանը Լոնդոնում հայկական սփյուռքի լրջագույն ներկայացուցիչներից է, և աշխարհի ամենաազդեցիկ հայերից մեկը»,- թերթին ասել է Պետերբուրգում հայկական համայնքի ղեկավար Կարեն Մկրտչյանը:
Թերթի տվյալներով` Նովոլադոժյան ջրագծի նախագծի մասնավոր ներդրումների ծավալը կկազմի 30 մլրդ ռուբլի, մնացած միջոցները կհատկացվեն մարզային և դաշնային բյուջեներից:
