Բրիտանական ընկերությունների և հաստատությունների հավատացյալ աշխատակիցները կարող են զրկվել աշխատանքից, եթե աշխատանքի ներկայանան կրծքին խաչով և հատկապես եթե պնդեն, որ այն կրելու իրավունք ունեն: Երկրի նախարարների գրասենյակը պատրաստել է որոշման նախագիծ, որում ասվում է, որ քրիստոնյաները չպետք է իրենց կրոնական պատկանելության նշանով ներկայանան աշխատանքի: Այս մասին այսօր հաղորդել է The Daily Telegraph-ը:
Կառավարական փաստաթղթում նշվում է, որ խաչի կրումը հավատացյալ քրիստոնյաների համար պարտադիր պահանջ չէ: Դա նշանակում է, որ գործատուներն իրավունք ունեն իրենց աշխատակիցներին արգելել դրանք կրել և անգամ կազատեն աշխատանքից նրանց, ովքեր կպնդեն որ իրավունք ունեն խաչ կրել:
Միաժամանակ քրիստոնյաների խաչեր կրելու իրավունքը պաշտպանված է Մարդու իրավունքների Եվրոպական կոնվենցիայի 9-րդ հոդվածով, որտեղ ասվում է մտքի, խղճի և կրոնի համընդհանուր իրավունքի մասին:
Բրիտանական եկեղեցականների ազդեցիկ ներկայացուցիչները սուր քննադատության են ենթարկել կառավարության այս որոշումը: Մասնավորապես, Քենթերբըրիի նախկին արքեպիսկոպոս լորդ Քերին հայտարարել է, որ սա հերթական ճնշումն է քրիստոնյաների և եկեղեցականների վրա:
