Արքայական գավաթի խաղարկության 1/4 եզրափակիչի առաջին խաղում «Բարսելոնա»-ն 5 անպատասխան գնդակ ուղարկեց սեկունդայի առաջատար «Բետիս»-ի դարպասը և հանգիստ խղճով կարող է գնալ Սևիլիա: Պեպ Գվարդիոլան հերթական անգամ ընդգծեց Արքայական գավաթի կարևորությունը:
Պահեստայինների կազմից միայն Պինտուն էր խաղադաշտում, և եթե կարելի է Մաքսվելին պահեստային անվանել, ապա՝ նաև Մաքսվելը, մյուսներն ամբողջությամբ հիմնական կազմի ֆուտբոլիստներն էին:
Առաջին խաղակեսում կատալոնացիները անընդհատ փորձում էին` որքան հնարավոր է՝ գեղեցիկ գոլի հեղինակ դառնալ, թերևս, հենց այդ պատճառով հանդիպման հաշիվը բացվեց ընդամենը 44-րդ րոպեին (Մեսսի): Երկրորդ խաղակեսը նույնպես անցավ «կապտանռնագույններ»-ի կատարյալ առավելությամբ. 62-րդ և 73-րդ րոպեներին աշխարհի լավագույն ֆուտբոլիստը ևս երկու անգամ աչքի ընկավ, 4 րոպե անց Պեդրոն հաշիվը դարձրեց 4:0։ 83-րդ րոպեին հանդիպման վերջին գոլը խփեց փոխարինման դուրս եկած Կեյտան:
Երեկ կայացավ նաև քառորդ եզրափակիչի «Վիլյառեալ»-«Սևիլիա» հանդիպումը: Ի տարբերություն Բարսելոնում կայացած խաղի, այստեղ հավասար թիմեր էին մրցում և հավասար արդյունք գրանցվեց: Առաջին խաղակեսում Կանիի ու Ռոսսիի խփած գոլերին պատասխանեց Նեգրեդոն: Երկրոդ խակեսի սկզբում Ռուբենը հաշիվը դարձրեց 3:1 հօգուտ «Վիլյառեալ»-ի, բայց շուտով Նեգրեդոն ևս մեկ անգամ կրճատեց տարբերությունը, իսկ հանդիպման վերջին րոպեներին հաշիվը հավասարեցրեց Ալեքսիսը` 3:3:
Քառորդ եզրափակիչի մյուս երկու հանդիպումները` «Ալմերիա»-«Դեպորտիվո», «Ռեալ»-«Ատլետիկո Մադրիդ», կկայանան այսօր: