Ըստ Աբխազիայի կենտրոնական ընտրական հանձնաժողովի հրապարակած նախնական տվյալների՝ մարտի 10-ի ընտրությունների արդյունքում հայտնի են 13 հաղթողների անունները:
Հիշեցնենք, որ մարտի 10-ին Աբխազիայում կայացել են Ազգային ժողովի ընտրություններ. 35 տեղերի համար հավակնում էին 148 թեկնածուներ:
Քվեարկությանը մասնակցել է ընտրողների 44.50%-ը:
Ըստ նախնական արդյունքների՝ հայտնի են 13 հաղթողների անունները: Նորընտիր պատգամավորների թվին է պատկանում նաև աբխազական ընդդիմության առաջնորդ Ռաուլ Հաջիմբան:
Քվեարկության երկրորդ փուլը կանցնի 22 ընտրատարածքներում, որոնցից յոթը գտնվում է Սուխումում:
Միջազգային դիտորդներն ընդգծել են, որ Աբխազիայի մարտի 10-ի խորհրդարանական ընտրություններն անցել են հանրապետության օրենսդրության և միջազգային չափանիշների համաձայն:
Աբխազիայի օրենսդրությամբ՝ ընտրությունները համարվում են կայացած, եթե դրանց մասնակցել է ընտրողների 25%-ը: Հաղթող է համարվում այն թեկնածուն, որը ստացել է ընտրության մասնակիցների ձայների կեսից ավելին:
Քվեարկության ընթացքին հետևում էին ինը երկրների ավելի քան 46 միջազգային դիտորդներ: