Այսօր Ազգային ժողովի մոտ տեղի ունեցավ օտարալեզու դպրոցների բացմանը դեմ հանդես եկող շարժման մասնակիցների ցույցը: Հիշեցնենք, որ այսօր մեկնարկող քառօրյային է ներկայացված այդպիսի դպրոցների բացումն օրինականացնող և հասարակական լայն ընդվզման ու զայրույթի պատճառ հանդիսացած փաթեթը: Մոտ մեկուկես ժամ կանգնելով Դեմիրճյան փողոցի մուտքի մոտ և տեղեկանալով, որ «Լեզվի մասին» և «Հանրակրթության մասին» օրենքներում փոփոխությունների նախագիծն այսօր չի քննարկվելու, ցուցարարները հեռացան: Մինչ այդ ընթերցվեց «Մենք դե՛մ ենք օտարալեզու դպրոցների վերաբացմանը» նախաձեռնության կոչը` ուղղված ԱԺ պատգամավորներին, որն ամբողջությամբ ներկայացնում ենք ստորև:
«Անցած վեց ամիսների ընթացքում, երբ առաջ քաշվեց «Լեզվի մասին» օրենքում փոփոխությունների նախագիծը, բյուրեղացան մի շարք գործընթացներ, որոնք հերթական անգամ ապացուցեցին` մեր կրթական համակարգը բազմաթիվ խնդիրներ ունի: Սակայն այս ժամանակահատվածը մեզ նաև ցույց տվեց, որ կրթական համակարգի այս վիճակի հիմնական պատճառը կրթության կառավարման և կրթական համակարգի համար օրենքներ գրող պատասխանատուների անիրազեկությունը և անգրագիտությունն է:
Դիմում ենք Ազգային ժողովի օվալաձև նոր դահլիճում հավաքված մեր «ընտրյալ» մեծամասնությանը. հիմա մենք հստակ ջրբաժանի առաջ ենք կանգնած. կա՛մ միասին դեմ ենք արտահայտվում այս օրինագծերին և լծվում ենք կրթական համակարգի խորքային խնդիրների վերհանմանն ու լուծմանը, կա՛մ դուք մեր կրթությունը տանում եք վերջնական կործանման: Իշխող կոալիցիայի պատգամավորները նախաձեռնող խմբի անդամների հետ անհատական հանդիպումների ժամանակ միշտ հավաստիացրել են, որ կիսում են մեր մտահոգությունները, սակայն կքվեարկեն այնպես, ինչպես որոշում կկայացնի ղեկավարությունը: Մենք կոչ ենք անում այդ պատգամավորներին` ինչպես զինվորը կարող է չկատարել իր ապաշնորհ վերադասի ապօրինի հրամանը, դուք էլ այսօր պարտավոր եք դեմ քվեարկել «Լեզվի մասին» և «Հանրակրթության մասին» օրենքներում փոփոխություններ կատարելու նախագծին: Դրանով դուք կխուսափեք ձեր ողջ կյանքի ընթացքում այս խարանը կրելուց և սերունդների նզովքից:
Մեր կոչը անտեսելու և օրինագծերին կողմ քվեարկելու դեպքում վստահեցնում ենք, որ ողջ ձեր քաղաքական գործունեության ընթացքում՝ յուրաքանչյուր հնարավորության դեպքում, հիշեցնելու ենք ձեզ այս օրերի ձեր կործանարար դիրքորոշման համար անհատական պատասխանատվության մասին»:
