«Էլիզաբեթ» արվեստի հիմնադրամը Նյու Յորքում կազմակերպել է ռուս հեռուստալրագրողուհի Եկատերինա Կաբալչիչի «Բելառուսական երազանք» փաստագրական ֆիլմի ցուցադրությունը:
Ֆիլմը նվիրված է 2010 թ. նախագահական ընտրություններին և հետագա իրադարձություններին: Բելառուսի քաղաքական մթնոլորտը ներկայացված է մի մարդու կյանքի խորտակմամբ, ինչը խորհրդանշում է երիտասարդ սերնդի ճգնաժամը, ովքեր մեծացել են Ալեքսանդր Լուկաշենկոյի կառավարման տարիներին, ով երկիրը ղեկավարում է արդեն 18 տարի:
Այդ սերնդին է պատկանում նաև Կաբալչիչը: Հավանաբար, հենց այդ պատճառով է ֆիլմն այդքան զգացմունքային, ողբերգական, բայց, այնուամենայնիվ, լավատեսական ստացվել:
Նյու Յորքում ֆիլմի ցուցադրության ժամանակ ելույթ է ունեցել գործարար Ալեքսանդր Ռախովսկին, ով մասնակցել է բողոքի ակցիաներին: Հենց նա էլ ֆիլմի հերոսի նախատիպն է։
Ռախովսկին հազարավոր մյուս քաղաքացիների նման 2010 թ. ընտրությունների գիշերը գտնվել է Անկախության հրապարակում և հավատացել է, որ ժողովրդավարությունն ի վերջո հաղթելու է: Նա անցել է ձերբակալությունների, խոշտանգումների միջով, նրա բիզնեսն անընդհատ ստուգել են ու վերահսկել, իսկ կինը կորցրել է աշխատանքը:
«Մենք հավատում ենք, որ վերափոխումների կողմնակիցներին այլևս չեն վռնդի մեր երկրից »,- ասել է Ռախովսկին:
