Սիրիահայերի կողմից հայկական անշարժ գույքի նկատմամբ հետաքրքրություն կա, և ՀՀ այցերի ընթացքում եկողները միանշանակ ուսումնասիրում են շուկան: Նման տեսակետ «Առաջին լրատվական»-ի հետ զրույցում հայտնեց «Ակցեռն» անշարժ գույքի գործակալության նախագահ Հակոբ Բաղդասարյանը՝ միաժամանակ նշելով, որ գործարքների տեսակետից ակտիվություն դեռ չկա:
«Այդ հետաքրքրությունն առայժմ թույլ է արտահայտվում, քանի որ սիրիահայերը բավականին տարբերվում են պարսկահայերից, և պարսիկների մոտ հետաքրքրությունն ավելի բարձր է, քան՝ սիրիահայերի մոտ: Գաղթելու դեպքում սիրիահայերը նախ ԱՄՆ, այլ երկրներ են փորձում գնալ, չնայած խնդիրներ ունեն ԱՄՆ գաղթելու հետ կապված»,- ասաց Հ. Բաղդասարյանը:
Նրա խոսքով՝ ընդհանուր շուկայում ակտիվացում չկա, հարաբերական անդորր է՝ թույլ ակտիվությամբ: Հ. Բաղդասարյանը նշեց, որ դրսից զգացվող ակտիվությունը լրացնում է մեր տեղական թերի պասիվությունը: Շոշափելի փոփոխություն չկա նաև գնային տեսանկյունից:
