Մ.թ. 66 թվականին ձուլված արծաթե շեկելը Նյու Յորքի աճուրդում վաճառվել է 1.1 միլիոն դոլարով: Այս մասին մարտի 9-ին հաղորդել է Associated Press-ը: Գնորդն ամերիկյան կոլեկցիոներ է, ում անունը չի հրապարակվում:
Մետաղադրամը ձուլվել է հրեական առաջին պատերազմի ժամանակաշրջանում, երբ հրեաներն ապստամբություն էին բարձրացրել հռոմեացիների դեմ: Շեկելի մի կողմում պատկերված է ծիսական գավաթ, մյուս կողմում` նռան ծառ՝ «Սուրբ Երուսաղեմ» գրությամբ: Մեզ հասել է ընդամենը երկու նման մետաղադրամ: Երկրորդը պահվում է Իսրայելի թանգարանում:
Heritage Auctions աճուրդի տանը վստահեցնում են, որ 1.1 միլիոն դոլարն ամենաբարձր գինն է, որ երբևէ վճարվել է հրեական մետաղադրամի համար: Վաճառված շեկելը նախկինում ներառված է եղել «Շոշանի հավաքածուում», որտեղ հաշվվում է ընդհանուր առմամբ 2.2 հազար հրեական մետաղադրամ: Art Daily-ի տվյալներով՝ դրանցից շատերն Իսրայելի թանգարանն ակնկալում է ստանալ ԱՄՆ-ում հրեական համայնքի օգնությամբ:
