Մաշտոցի պուրակի ակտիվիստները ժամանակ են տվել քաղաքապետարանին և իշխանությանը: Այս մասին «Առաջին լրատվական»-ին տեղեկացրեց Մաշտոցի պուրակի ակտիվիստ, «Թռչկան» քաղաքացիական նախաձեռնության անդամ Ռուզաննա Գրիգորյանը` ներկայացնելով պուրակի պաշտպանության ծրագիրը:
Ակտիվիստը տեղեկացրեց, որ երեկ պուրակում կայացած ակցիայի ժամանակ բնապահպան ակտիվիստ Մարիամ Սուխուդյանն իր հայտարարությամբ ժամանակ տրամադրեց քաղաքապետարանին և իշխանությանը Մաշտոցի պուրակում տեղադրված կրպակների ապամոնտաժման համար: Ըստ Ռ. Գրիգորյանի` եթե մինչև երեքշաբթի քաղաքապետարանը ապամոնտաժման որոշում չկայացնի, իրենք կսկսեն նստացույց մինչև կառավարության նիստի` հինգշաբթի օրը:
«Եթե հինգշաբթի օրը նույնպես հարցը չվերանայվի, մենք ուրբաթ օրը մեր իսկ ուժերով կապամոնտաժենք Մաշտոցի պուրակում տեղադրված կրպակները»,- նշեց Ռ. Գրիգորյանը` հավելելով, որ այդպիսով կրպակների հանրային տարածքը կհանձնեն հանրությանը, քանի որ այն պատկանում է հանրությանը:
«Առաջին լրատվական»-ի հարցին, թե ինչպես պետք է ապամոնտաժեն կրպակներն ակտիվիստները, նա պատասխանեց, որ դեռ ապամոնտաժման տեխնիկական հարցերը չեն հստակեցվել, պատասխաններ չունեն: «Չենք որոշել, դեռ տեխնիկական հարցերին չենք անդրադարձել` ինչպես պետք է ապամոնտաժենք: Հարցն այն է, որ հանրությունն ինքն է ապամոնտաժման աշխատանքներին տեր կանգնելու»,- մեկնաբանեց բնապահպան ակտիվիստ Ռուզաննա Գրիգորյանը:
Տեղեկացնենք, որ Մաշտոցի պուրակի «պաշտպանությունը» արդեն մեկ ամիս է, ինչ շարունակվում է: «Մենք ենք այս քաղաքի տերը», «Մեր քաղաքը», «Թռչկան» քաղաքացիական նախաձեռնությունների անդամները, բնապահպանները պայքարում են Աբովյան փողոցից ապամոնտաժված և Մաշտոցի պուրակում տեղադրված կրպակների ապամոնտաժման համար: Նրանց պնդմամբ` հանրային տարածքում չպետք է տեղադրվեին նման կրպակներ` խախտելով մի շարք օրենքներ:
Ավելի վաղ «Առաջին լրատվական»-ի հետ զրույցում քաղաքաղապետարանի լրատվության վարչության պետ Արթուր Գևորգյանն ասել էր, որ կրպակների տեղադրման ժամանակ ոչ մի օրենք չի խախտվել, և կրպակները տեղադրված են ժամանակավոր, մինչև «Հին Երևան» ծրագրի իրագործումը:
