Հայաստանը երբեք չի հետևի Ղազախստանի ու Ռուսաստանի օրինակին և չի հրաժարվի ընտրությունների ժամանակ ԵԱՀԿ դիտորդական առաքելությունից, քանի որ ԵԱՀԿ կարծիքը նրա համար մեծ նշանակություն ունի: «Առաջին լրատվական»-ի հետ զրույցում նման համոզմունք հայտնեց քաղաքական և ընտրական տեխնոլոգիաների փորձագետ Արմեն Բադալյանը:
«Ղազախստանն ու Ռուսաստանն այնքան հարուստ երկրներ են, որ կարող են գոյատևել առանց ԵԱՀԿ-ի, իսկ Հայաստանն այնքան թույլ է, որ ԵԱՀԿ կարծիքը նրա համար բավական մեծ նշանակություն ունի: Այդ կարծիքը կարծիք չէ միայն ընտրությունների մասին, դա ԵԱՀԿ երկրների վերաբերմունքն է Հայաստանի նկատմամբ: Այո, Հայաստանն այնքան հարուստ չէ, որ իրեն նման շռայլություն թույլ տա: Ռուսաստանի ու Ղազախստանի նման իրենց շռայլություն կարող են թույլ տալ, ասենք, Բելառուսը, Ուզբեկստանն ու Ադրբեջանը, իսկ Հայաստանի նման ԵԱՀԿ կարծիքից կախված են Մոլդովան, Ուկրաինան»,- ասաց նա:
Հիշեցնենք, որ Ղազախստանի նախագահ Նուրսուլթան Նազարբաևը սուր քննադատության էր ենթարկել ԵԱՀԿ գործունեությունը և հայտարարել, որ իր երկիրը ընտրություններ անցկացնելու ընթացքում կարող է հրաժարվել ԵԱՀԿ դիտորդական առաքելության ներկայությունից: Հիշեցնենք նաև, որ Ղազախստանում հունվարի 15-ին կայացած խորհրդարանական ընտրությունները ԵԱՀԿ դիտորդների գնահատականներով չէին համապատասխանում ժողովրդավարական հիմնարար չափորոշիչներին:
ԵԱՀԿ դիտորդական առաաքելությունից դժգոհ էր մնացել նաև Ռուսաստանը, ուր մարտի 4-ին նախագահական ընտրություններ էին անցկացվել:
