Ճանապարհային ոստիկանության ճանապարհապարեկային ծառայության պետ, ոստիկանության գնդապետ Նորիկ Սարգսյանը, ամփոփելով 2010թ., նշեց, որ 2010թ. հետիոտնի նկատմամբ կազմվել է 22,824 արձանագրություն, նախորդ տարվա` 6876-ի փոխարեն, այսինքն` արձանագրությունների թիվն ավելացել է 15,948-ով: «Հետիոտնը բոլորիս աչքի առաջ է, և նկատում ենք, որ նա սկսում է պահպանել ճանապարհային երթևեկության կանոնները: 2010թ. Հայաստանի Հանրապետությունում ճանապարհապարեկային ծառայության ուժերով հայտնաբերվել է 728,644 բոլոր տեսակի խախտում, որը նախորդ տարվա ցուցանիշը գերազանցում է 53 հազարով: Բոլոր տարիների վիճակագրությունը ցույց է տալիս, որ գրանցված պատահարների 1/3-ը հետիոտնի վրաերթ է, շատ քիչ դեպքերում է, որ հետիոտնը վրաերթի է ենթարկվում վարորդի մեղքով»,- նշում է Նորիկ Սարգսյանը:
Գնդապետ Սարգսյանն ավելացրեց նաև, որ իրենց ծառայողական պարտականությունները չկատարելու համար 2010թ. ընթացքում իրենց զբաղեցրած պաշտոնից հեռացվել է 7 աշխատակից, կարգապահական տույժի ենթարկվել` 30-ը, իսկ իրենց ծառայողական պարտականությունները բարեխղճորեն կատարելու համար խրախուսվել է 219 աշխատակից: