Միթ Ռոմնին «սուպեր երեքշաբթի» կոչվող նախնական ընտրություններում չի կարողացել առաջ անցնել իր հակառակորդ Ռիք Սանտորումից: Սանտորումը կարողացել է հաղթել Օհայոյում, որը լավագույն մրցանակն է 10 նահանգներից բաղկացած մրցույթում:
Նա նաև կարողացել է բավականին շատ ձայներ հավաքել Թենեսիում, Օկլահոմայում և Հյուսիսային Դակոտայում:
Ռոմնին ձայների մեծ մասն ստացել է Մասաչուսեթս նահանգում,Վերմոնթում ինչպես նաև Վիրջինիայում:
Գինգրիչը հաղթել է իր հայրենի Ջորջիայում, մինչդեռ Ալյասկայի և Այդահոյի արդյունքները պարզ կլինեն առաջիկա մի քանի ժամերի ընթացքում:
Չնայած ընդհանուր խառնաշփոթին՝ բոլորի ուշադրությունը կենտրոնացած էր Օհայոյի վրա, որտեղ ընթացող ընտրությունները կարևոր են նրանով, որ վերջապես կպարզվի՝ ով մարտահրավեր կնետի ներկայիս նախագահ Բարաք Օբամային նոյեմբերի 6-ին կայանալիք նախագահական ընտրություններում:
Ընդհանուր 60 տոկոս ձայներից Օհայոյում Սանտորումը Ռոմնիից առաջ անցավ՝ ստանալով ձայների 38 տոկոսը, մինչդեռ Ռոմնին ուներ 37 տոկոս ձայն:
Ըստ հարցումների՝ Օհայոյում բնակչության մեծ մասն ընդունել է, որ Ռոմնին նախագահ Բարաք Օբամային հաղթելու շատ ավելի մեծ հնարավորություններ ունի, սակայն Սանտորումը առավել հետաքրքրված է ամերիկացիների անհանգստություններով: Սանտորումը իր աջակցությունը հիմնականում ստացել է միջին չափի եկամուտ ունեցող ընտրողներից:
