Սաակաշվիլի. ՆԱՏՕ-ին Վրաստանի անդամակցությունը ժամանակի խնդիր է

12 Հունվար, 2011 12:24

Դիտումներ՝ *

Երեկ Վրաստանի նախագահ Միխեիլ Սաակաշվիլին մեծ հարցազրույց է տվել ուկրաինական «5-րդ ալիքին», որում մի շարք ուշագրավ հայտարարություններ է արել:
Նա մասնավորապես ասել է, որ ՆԱՏՕ-ին Վրաստանի ինտեգրացիան անհրաժեշտ է երկրի ազգային անվտանգության ապահովման համար. «Ինչ վերաբերվում է ՆԱՏՕ-ին, ապա միանգամայն վստահ եմ, որ դա ժամանակի խնդիր է: Ավելի լավ կազմակերպություն ոչ ոք մինչև հիմա չի ստեղծել, միայնակ ոչ մեկը չի կարող ապահովել իր անվտանգությունը, հատկապես փոքր երկրները, սակայն կարծում եմ, որ դա վերաբերում է նաև Ուկրաինային: Մենք չունենք այլ երկրների նկատմամբ թշնամական մտադրություններ, ուղղակի փորձում ենք գոյատևել և զարգանալ, այսքանը: Եվ, իհարկե, փոքր Վրաստանը ոչ մեկի վրա չի հարձակվի, հատկապես մեծ հարևանների, դա անմտության գագաթնակետը կլիներ: Սակայն որպեսզի գոյատևենք, մենք պետք է ունենանք անվտանգության մինիմալ երաշխիքներ: Սա մեզ համար ակնհայտ է և քննարկման ենթակա չէ»,- ասել է Վրաստանի նախագահը:
Սաակաշվիլին նաև խոսել է ձերբակալված նախկին պաշտոնայների մասին: Նա ասել է, որ շատերն են ձերբակալվել իշխանափոխությունից հետո, սակայն նրանք բոլորն ազատ են արձակվել, երբ փոխհատուցել են պետությանը հասցրած վնասները:
«Այն ժամանակ մեր բյուջեին գումարներ էին հարկավոր: Եվ ի՞նչ կարիք կար մաֆիայի ներկայացուցիչներին իրենց գումարներով հանդերձ պահել բանտերում: Որպեսզի նրանք այդ գումարներով մամուլի, իրենց փաստաբանների, միջազգային կազմակերպությունների միջոցով վնասե՞ն մեզ, այն դեպքում, երբ կարելի էր նրանց բանտերից դուրս թողնել առանց այդ գումարների: Կարծես բոլոր կողմերն էլ գոհ էին»,- նշել է նա:
Սաակաշվիլին անդրադարձել է նաև Աբխազիայում և Հարավային Օսիայում ռուսական իշխանությունների գործողություններին: Նա ասել է, թե նրանք «բեռլինյան պատ» են կառուցում, քանի որ թույլ չեն տալիս հիշյալ տարածաշրջաններ մուտք գործել նախկինում այդտեղ ապրած մարդկանց` վրացիներին, ուկրաինացիներին, հույներին և այլոց: «Միայն աբխազներին և ռուսներին է թույլ տրված մուտք գործել այնտեղ»: