Երեկ Facebook սոցիալական ցանցում նոր նախաձեռնությամբ է հանդես եկել Հայ ազգային կոնգրեսի անդամ, ԱԺ նախկին փոխնախագահ Կարապետ Ռուբինյանը: Ըստ հայտարարության` նա նախաձեռնում է ստեղծել առցանց ազատականների ալյանս (այսուհետ` 3 Ա), որը հայ իրականության մեջ առաջին փորձն է համացանցի միջոցով միավորելու Հայաստանի, Արցախի ու Սփյուռքի ազատականներին և նրանց համատեղ առցանց գործունեությունը ծառայեցնելու ի շահ մեր երկրի ու ժողովրդի: «3 Ա-ում միասին փորձելու ենք ոչ միայն քաղաքական գործունեության նոր ձևեր կիրառել, այլև հիմնել ազատականության և ժողովրդավարության հայ հասարակության համար նոր ավանդույթներ, այն է` գործունեության լիակատար թափանցիկություն, ֆինանսական լիակատար անկախություն, անդամների լիակատար հավասարություն, ներքին կառավարման խորը ժողովրդավարացում ու ղեկավար մարմինների հաճախակի, մրցակցային ընտրություններ», – հայտարարության մեջ նշել է Կարապետ Ռուբինյանը:
Նոր ստեղծված նախաձեռնության մասին «Առաջին լրատվականը» զրուցել է ՀԱԿ անդամ Կարապետ Ռուբինյանի հետ:
– Պարոն Ռուբինյան, Ձեր տարածած հայտարարությունից երևում է, որ որպես ՀԱԿ անդամ` Ձեզ չի գոհացնում Կոնգրեսի գործունեությունը, և Դուք նոր հարթակ եք փնտրում` Ձեր գաղափարներն իրացնելու համար:
– Հայ ազգային կոնգրեսը բոլորովին այլ կառույց է: Այնտեղ ո՛չ ընտրությունների մեխանիզմ կա, ո՛չ ֆինանսական խնդիրներ կան. տարբեր կուսակցություններ միավորվել են մի կառույցի մեջ: Համեմատություններ անելն անիմաստ է:
– Դուք փորձե՞լ եք Ձեր մտահոգությունները բարձրաձայնել Հայ ազգային կոնգրեսում:
– Ինչո՞ւ պետք է բարձրաձայնեի: Դրանք միանգամայն տարբեր հարթություններում գտնվող խնդիրներ են: Ես իմ նախաձեռնությամբ չեմ հակադրվում Հայ ազգային կոնգրեսին: Ինքս շարունակում եմ մնալ ՀԱԿ անդամ, իսկ նախաձեռնությանը անդամագրվածների մեջ կան ՀԱԿ անդամներ:
– Դուք ակնկալում եք նաև Արցախի ու սփյուռքի ազատականների աջակցությունը, որպեսզի նրանք իրենց համատեղ գործունեությունը ծառայեցնեն ի շահ մեր երկրի ու ժողովրդի: Բայց, դատելով սփյուռքի մտավորականների պահվածքից, այսօր նրանց ավելի շատ մտահոգում են Ցեղասպանության ճանաչման և Հայ դատի խնդիրները, քան ժողովրդավարության և ազատական գաղափարների հաղթանակը Հայաստանում:
– Եթե չեն հուզում, ուրեմն կոչին չեն հետևի և չեն միանա: Ես Facebook-ից դուրս էլ ճանաչում եմ մեծ թվով ազատական հայացքների տեր մարդկանց, և ով ցանկանա միանալ` կարող է միանալ այդ կոչին:
– Արցախո՞ւմ էլ եք հանդիպել ազատական հայացքների տեր անձանց:
– Ինչպե՞ս կարող է պատահել, որ որևէ հասարակության մեջ չլինեն առաջադեմ, ազատական հայացքների տեր մարդիկ:
– Դուք Ձեր հայտարարության մեջ նշել եք, որ մոտակա մեկ-երկու ամսում նախատեսում եք ձևավորել 10-15 հոգանոց, 3 Ա-ի առցանց համագումարը նախապատրաստող նախաձեռնող խումբ: Տպավորություն է ստեղծվում, որ Դուք ուզում եք ստեղծել առանձին կուսակցություն:
– Ես ուզում եմ ստեղծել մի հարթակ, որտեղ պետք է միավորվեն Հայաստանի, Արցախի և սփյուռքի հայության մտավոր կարողությունները: Այդ հարթակը կարող է կայանալ, կարող է չկայանալ: Հետո այդ հարթակը, եթե կայանա, կդառնա ժողովրդավարության, ազատականության սկզբունքներով կառավարվող մի մարմին: Ես կփորձեմ ինձ հեռու պահել ղեկավար մարմնից, երբ այն սկսի գործել: Ուրիշ նպատակ ես այս պահին չեմ հետապնդում:
