ՀԱԿ համամասնական ցուցակի վերաբերյալ ևս եղել է անհամաձայնություն: Այսօր լրագրողների հետ հանդիպմանը հայտնեց Հայ ազգային կոնգրեսի քաղխորհրդում «Հայ կամավորականների համախմբում» ազգային-քաղաքական նախաձեռնության ներկայացուցիչ, 1992-94 թթ. Գորիսի քաղաքապետ, ինքնապաշտպանության կոմիտեի նախագահ Սամվել Հարությունյանը։ Նա ներկայացրեց օրեր առաջ ՀԱԿ-ին անդամակցող 4 քաղաքական միավորների՝ համամասնական ցուցակում ընդգրկվելուց հրաժարվելու պատճառները։
Ս. Հարությունյանը նշեց, որ բացի ռազմավարական և մարտավարական հարցերի շուրջ եղած տարաձայնություններից, ՀԱԿ-ում եղել են անհամաձայնություններ՝ կապված համամասնական ցուցակի կազմման հետ:
Ըստ նրա` ՀԱԿ 13 ուժերը եկել էին հետևյալ համաձայնության. ցուցակի առաջին երեք տասնյակի յուրաքանչյուր տասնյակում 7 հոգի պետք է ներկայացնեն ՀԱԿ-ին անդամակցող քաղաքական ուժերը և 3-ը՝ այլ արժանավորներ` քաղբանտարկյալ, մտավորական, երիտասարդ և այլն:
«Հաշվի առնելով նաև օրենքի պահանջը քաղաքական ցուցակի վերաբերյալ` մենք պարտադիր պայման չէինք համարում, որ որևէ ուժ պետք է անպայման իր ղեկավարին առաջարկի: Օրինակ` ՀՀՇ ներկայացուցիչները պնդում էին, թե դա ճիշտ չի լինի, և պետք է ավելի շատ տեղ տալ անկուսակցականներին, թեև ես աշխարհում չգիտեմ մի օրինակ, որ առաջին տասնյակի 30 %-ից ավելին ընդգրկված լինեն անկուսակցականները. ի դեպ, այս ուժերի մեծ մասը գրանցված կուսակցություններ չեն, և ազգանունների կողքը նաև գրվելու է անկուսակցական:
Ասում էինք նաև, որ քաղաքական ուժը կարող է իր առաջին տեղում անկուսակցականի ներկայացնել»,- նշեց Ս. Հարությունյանը`հավելելով, որ
նրանք սկզբում որոշել էին ցուցակը կազմել 6 կուսակցական և 4 անկուսակցական համամասնությամբ, իսկ դրանից երկու օր անց ասացին, որ փոխել են իրենց մոտեցումը՝ համամասնությունը դարձնելով 5-5:
Անդրադառնալով Մարտի 1-ի հանրահավաքի համար իր կողմից ներկայացված հայտարարության նախագծին` նա հավելեց, որ իր նախագծում առաջարկում էր մարտի 9-ին Ազատության հրապարակում անցկացնել ակցիա՝ նշելով, որ ՀԱԿ առաջնորդը կարող էր անժամկետ հացադուլ հայտարարել:
«Համոզված եմ` նրան կմիանային այլ անձինք ևս, և այդ իրադարձությունը մեծ հնչեղություն կստանար և արդյունք կտար՝ մոտեցնելով արտահերթ ընտրությունների անցկացումը»,- մեկնաբանեց բանախոսը:
