Իրանական Mehr News լրատվական գործակալության փոխանցմամբ՝ ուրբաթ օրը Իրանում տեղի ունեցած խորհրդարանական ընտրությունների արդյունքում Իրանի գերագույն ղեկավար և հոգևոր առաջնորդ այաթոլլահ Ալի Խամենեիի համակիր պահպանողականները համոզիչ հաղթանակ տարան նախագահ Մահմուդ Ահմադինեժադի համակիրների նկատմամբ:
Խորհրդարանական ընտրությունների առաջին փուլի արդյունքում հայտնի դարձավ, թե 290 հոգանոց մեջլիսում ովքեր են զբաղեցնելու 225 պատգամավորական աթոռները: Իրանի ներքին գործերի նախարար Մոսթաֆա Մոհամադ Նաջարը հայտարարել է, որ առաջին փուլի արդյունքում պահպանողականները ստացել են ավելի քան 200 պատգամավորական մանդատ:
Ինչ վերաբերում է ռեֆորմիստներին, ապա նրանք ստացել են մոտավորապես 20 պատգամավորական մանդատ: Դա նշանակում է, որ խորհրդարանում նրանց ներկայացվածությունը կրճատվում է 3 անգամ: Ընդ որում՝ 65 ընտրատեղամասերում չի հաջողվել առաջին փուլի արդյունքներով պարզել հաղթողին, ինչի համար էլ անցկացվելու է կրկնակի քվեարկություն, որը կլինի ապրիլից ոչ շուտ: Դրան կմասնակցեն 130 հավակնորդներ:
Իրանի ՆԳՆ-ի տվյալներով՝ ընտրություններին մասնակցել է քվեարկելու իրավունք ունեցողների 65 տոկոսը, ինչը 10 տոկոսով ավելի է՝ համեմատած 2008 թվականի խորհրդարանական ընտրությունների հետ: Իրանական ընդդիմությունը չի ընդունում այդ տվյալները և մասնավորապես այն, որ Թեհրանում մասնակցության ցուցանիշը կազմել է 48 տոկոս, ինչը, նրա կարծիքով, ուռճացված է:
