Ըստ «Ազատություն» ռադիոկայանի` հայկական հանցագործ խմբավորման անդամ լինելու կասկածանքով Չեխիայում ամիսներ առաջ ձերբակալված, այնուհետև՝ անցած տարվա հոկտեմբերին ազատ արձակված Արսեն Կակոսյանն արդեն Հայաստանում է: 1967 թվականին ծնված Կակոսյանը Հայաստան է տեղափոխվել 2010 թվականի դեկտեմբերի 17-ին Պրահա–Երևան չվերթով: Տեղափոխումն իրականացվել է Հայաստանի ոստիկանության Քրեական հետախուզության գլխավոր վարչության և Հայաստանում Ինտերպոլի ազգային կենտրոնական բյուրոյի օպերխմբի կողմից: Կակոսյանը հետախուզման մեջ էր 1996թ.-ից: Նրան ներկայացվել էր խարդախության մեղադրանք` Հայաստանի քրեական օրենսգրքի 178 հոդվածի 2-րդ մասի 2-րդ կետի հատկանիշներով, որով նախատեսվում է պատիժ` նվազագույն աշխատավարձի չորսհարյուրապատիկից յոթհարյուրապատիկի չափով տուգանքի, կամ երկուսից վեց տարվա ազատազրկման տեսքով:
Հայաստանի արտգործնախարարության մամուլի քարտուղար Տիգրան Բալայանն այսօր «Ազատություն» ռադիոկայանի հետ զրույցում ընդգծել է, որ Կակոսյանը ոչ թե արտաքսվել է Չեխիայից, ինչպես անցած շաբաթ գրել էր Prague Daily Monitor պարբերականը, այլ արտահանձնման է ենթարկվել հայկական կողմի դիմումով` նրա նկատմամբ ավելի վաղ Հայաստանում հարուցված քրեական գործի շրջանակներում: