Իրանական Fars News լրատվական գործակալության փոխանցմամբ՝ Իրանի Գերագույն դատարանը չեղյալ է հայտարարել իրանական ծագում ունեցող ԱՄՆ քաղաքացի Ամիր Միրզա Հեքմաթիի նկատմամբ կայացված մահվան դատավճիռը: Նրա գործն ուղարկվել է վերանայման:
Նշվում է, որ 28-ամյա Հեքմաթին ձերբակալվել էր 2011 թվականի օգոստոսին, ինչի մասին բարձրաձայնվել էր դեկտեմբերին, երբ իրանական հեռուստատեսությամբ ցուցադրվեց, որ նա խոստովանում է Կենտրոնական հետախուզական վարչության (ԿՀՎ) գործակալ լինելը:
Մեղադրող կողմը պնդում էր, որ նա պետք է ապատեղեկատվության միջոցով մոլորեցներ իրանական հետախուզությանը: Իսկ Հեքմաթիի հարազատները նշում էին, որ նա Իրան է ժամանել տատին տեսակցելու համար:
Սպիտակ տունն ու ԱՄՆ պետդեպարտամենտը հայտարարեցին, որ նա գործակալ չէ և պահանջեցին ազատ արձակել նրան: Սակայն 2012 թվականի հունվարի 9-ին իրանական դատարանը Հեքմաթին մահվան դատապարտեց:
Իրավապաշտպանները վստահեցնում էին, որ Հեքմաթին դարձել է ԱՄՆ առաջին քաղաքացին, ում 1979 թվականի իսլամական հեղափոխությունից հետո Իրանում դատապարտում են մահապատժի:
