Կոլումբիայի հեղափոխական զինված ուժերի ապստամբները (FARC) պատրաստակամություն են հայտնել հրաժարվել զինված պայքարից: Այդ մասին կոլումբիացի իրավապաշտպան Մարլենի Օրհուելիին իր նամակի մեջ հայտնել է ապստամբների նոր առաջնորդը` Թիմոլեոն Ջիմենեսը: Դիմումի տեքստը տեղադրված է FARC-ի պաշտոնական կայքում:
Իր նամակում Ջիմենեսը ափսոսանք է հայտնել երկրում ամենօրյա արյունահեղությունների համար:
Մարլենի Օրհուելը, որին դիմել է FARC առաջնորդը, գլխավորում է մարդու իրավունքների ASFAMIPAZ կազմակերպությունը, որը զբաղվում է ապստամբների կողմից առևանգված մարդկանց ազատմամբ:
Ըստ Colombia Reports տվյալների՝ ապստամբները նրան են ընտրել որպես երկրի ղեկավարության հետ բանակցություններ վարելու միջնորդ:
Ջիմենեսը ակտիվիստուհուն ուղղված նամակում նշել է նաև, որ պատանդների թիվը գերագնահատված է: Նա հերքել է նաև FARC-ի ներգրավվածությունը խաղաղ բնակչություն դեմ մի շարք ահաբեկչական հարձակումներում:
FARC-ը ստեղծվել է 1964 թ.: Այս խմբավորումը, որը բաղկացած է ավելի քան 8 հազար մարդուց, պայքարում է «նոր Կոլումբիայի» ստեղծման համար՝ համընդհանուր հավասարության սկզբունքի հիման վրա: Որոշ երկրներում այն համարվում է ահաբեկչական:
