Գործարարները շատ հաճախ բողոքում են վարկավորման տոկոսադրույքներից և վարկ վերցնելու դժվարություններից: «Առաջին լրատվական»-ի հետ զրույցում Բանկերի միության նախագահ Աշոտ Օսիպյանը չհամաձայնեց այդ գնահատականի հետ: Ըստ նրա՝ պետք է համեմատություն կատարել:
Ա. Օսիպյանի խոսքով՝ բանկերը սկսնակ բիզնեսի վարկավորման համար չեն: Որպես ինստիտուցիոնալ կառույց դրա համար կան վենչուրային կապիտալներ, ներդրումային հիմնադրամներ, որոնք ստեղծվել են հատուկ սկսնակ բիզնեսի վարկավորման համար:
Բանկերը պահանջում են 1-6 տարի կայուն պատմություն, որը, միության նախագահի կարծիքով, նորմալ է, որովհետև բանկերը ստեղծված են արդեն աշխատող, քայլող բիզնեսի վարկավորման ու աշխատող բիզնեսի մեծացման համար. «Մենք ունենք բավականին շատ վարկեր, որոնք ուղղված են ՓՄՁ-ներին, նույնիսկ 1000 դոլարանոց վարկեր կան, որոնց համար անգամ գրավ չի պահանջվում: Դա հատուկ էքսպրես կամ խմբակային վարկեր են, որոնց համար գրավի առարկա պետք չի: Պետք է ունենալ բիզնես, ունենալ ծրագիր, բանկերի հետ աշխատելու ունակություն: Բանկերից վախենալ պետք չի»:
Ընդ որում, Ա. Օսիպյանի հավաստմամբ՝ հայկական բանկերն ավելի մատչելի են, քան հարևան երկրներում՝ Վրաստանում և Ադրբեջանում, չնայած ռիսկերը նույնն են: ՀՀ-ում խոշոր բիզնեսի վարկավորումը կատարվում է 9-10% տոկոսադրույքով, Վրաստանում՝ 14%:
Ա. Օսիպյանը չհամաձայնեց որոշ գործարարների այն պնդմանը, որ 10%-ով վարկ ստանալու համար ծանոթի միջնորդություն է հարկավոր. «Բիզնես ծրագիր կա: Չեմ կարծում, որ ծանոթ-բարեկամով կարելի է վարկ ստանալ: Անհնարին է: Խնդիր կա՝ ծրագիրը պետք է գնահատել, քանի որ առևտրային բանկերում մարդը չի որոշում ռիսկը: Կա ծրագիր, որը տալիս է, թե վարկը քանի տոկոսով պետք է տրվի: Դա կոչվում է ռիսկի վրա հիմնված գնանշում»:
Միության նախագահի խոսքով, այսօր բանկերն իրենք են փնտրում լավ հաճախորդ, որ ունի լավ վարկային պատմություն, լավ պատկերացում գործից: «Այդ պատկերացումը վաղուց անցել է, որ կարելի է բանկերից ծանոթով վարկ ստանալ: Հիմա շատ մեծ մրցակցություն է, և գրավը երրորդ, չորրորդ տեղում է»,- նշեց Ա. Օսիպյանը:
