Չեչնիայի ղեկավար Ռամզան Կադիրովը պարել է ընտրատեղամասում, այդպիսով հաստատելով հանրապետության ԿԸՀ–ի ղեկավարի խոսքերն այն մասին, որ ընտրությունները տեղի են ունենում «տոնական մթնոլորտում»:
Չեչենական առաջնորդի պարը տեսագրել են վեբ-տեսախցիկները, որոնք տեղադրված են Ցենտարոյ գյուղի №167 ընտրատեղամասում: Տեսանյութը webvybory2012 պորտալից անմիջապես հայտնվել է Youtube-ում:
«Կադիրովի հետ ընտրության է գնացել նաև նրա մայրը` Այմանի Նեսիևնան, ինչպես նաև ընտանիքի այլ անդամներ»,– հաղոդում է Фонтанка.ру-ն: Քվեատուփի մեջ ընտրաթերթիկը գցելիս, Ռամզան Կադիրովը նշել է, որ «քվեարկել է ուժեղ ղեկավարով ուժեղ երկրի օգտին»,-ասվում է Չեչենական Հանրապետության կառավարական կայքում:
Նա հույս է հայտնել, որ Չեչնիայում ընտրությունները կանցնեն մասնակցության բարձր ցուցանիշով: «Մեզ մոտ մարդիկ ակտիվ են: Հանրապետությունում ընտրություններին մասնակցության բարձր ցուցանիշն արդեն ավանդույթ է դարձել: Այդ իսկ պատճառով ես վստահ եմ, որ այս անգամ ևս ընտրողները կգան և կկատարեն իրենց քաղաքացիական պարտքը»,- ասել է Կադիրովը:
«Բոլոր բնակավայրերում փողոցները լի են մարդկանցով, ովքեր գնում են ընտրատեղամասեր կամ հետ են վերադառնում քվեարկած: Սա իրական տոն է. այն, ինչ տեղի է ունենում, այլ կերպ բնութագրել հնարավոր չէ: Մարդիկ ընտանիքներով են գնում, երեխաներին են իրենց հետ տանում: Ժողովուրդն ընտրության արդյունքների հետ է կապում իր և իր երկրի ապագան»,– ասել է Չեչնիայի նախագահը:
