«Գնումների մասին» ՀՀ օրենքի 46-րդ հոդվածի համաձայն, գնումների բողոքարկման խորհրդի կազմում ընդգրկվում են մեկական ներկայացուցիչներ գրանցված և ՀՀ ֆինանսների նախարարություն գրավոր դիմում ներկայացրած ՀՀ հասարակական կազմակերպություններից (միավորումներից):
Բողոքարկման խորհրդի անդամների ցուցակը հրապարակում է ՀՀ ֆինանսների նախարարությունը, իսկ անդամներին ներկայացվող պահանջները և սահմանափակումները սահմանված են վերոնշյալ հոդվածով: Այս մասին ասվում է ՀՀ ֆինանսների նախարարության կողմից տարածած մամլո հաղորդագրությունում:
Գնումների բողոքարկման խորհրդի կազմում ներկայացուցիչ ընդգրկելու նպատակով ՀՀ գրանցված հասարակական կազմակերպությունները (միավորումները) պետք է ՀՀ ֆինանսների նախարարություն (ք. Երևան, Մելիք-Ադամյան 1) ներկայացնեն գրավոր դիմում:
Դիմումին անհրաժեշտ է կցել թեկնածուի անձնագրի պատճենը` նշելով նաև աշխատանքային հեռախոսահամարը և էլեկտրոնային փոստի հասցեն: