1949թ. այս օրը Երևանում ծնվեց հայ Ճարտարապետ, երաժիշտ, կոմպոզիտոր, ռոք-երաժիշտ, բանաստեղծ, երգիչ Արթուր (Արտաշես) Մեսչյանը`ԽՍՀՄ-ում առաջին ռոք-խմբի` «Առաքյալներ»-ի (1968-1979թթ.) հիմնադիրը:
Յոթ տարեկանից Մեսչյանը Երևանի Սպենդիարովի անվան երաժշտական դպրոցում ջութակի ու դաշնամուրի դասերի է հաճախել, երգել Ա. Սպենդիարովի անվան հայկական ակադեմիական օպերայի և բալետի թատրոնի տղաների երգչախմբում: Հետագայում Մեսչյանը ինքնուրույն կիթառ նվագել է սովորել: Դպրոցական տարիներին նա սկսում է երաժշտություն գրել: Հասուն տարիքում արդեն` 1973թ. մոտ մեկ տարի Արթուր Մեսչյանը երգում է Մայր Աթոռ Սուրբ Էջմիածնի երգչախմբում, ինչը հետագայում մեծ ազդեցություն է թողնում իր ստեղծագործությունների վրա:
16 տարեկան հասակում, Արթուր Մեսչյանը գրում է «Ու՞ր էիր Աստված», «Կտակը» և «Ծերունի» երգերը: 1966թ. Մեսչյանն ընդունվում է Երևանի Պոլիտեխնիկական ինստիտուտի ճարտարապետաշինարարական ֆակուլտետ: Ինստիտուտի առաջին կուրսում` 1967թ. Մեսչյանը ստեղծում է «Առաքյալները» (Apostles) ռոք-խումբը: Հաջորդ տասնամյակի սկզբերին «Առաքյալներ»-ն անսպասելիորեն անհայտացավ երաժշտական բեմից: Գործունեության ամբողջ տարիների ընթացքում Արթուր Մեսչյանը եղել է խմբի առաջատարը և կատարված բոլոր երգերի հեղինակը:
1989թ. Մեսչյանը կնոջ և երկու որդիների հետ տեղափոխվում է Բոստոն (ԱՄՆ): Բոստոնում աշխատանքի հետ զուգահեռ նրան վերջապես հաջողվում է ձայնագրել երկու տասնամյակ կուտակված նյութերը: Մեսչյանը 1990թ. ձայնագրում և 1991թ. թողարկում է իր առաջին ալբոմը` Catharsis-ը, որը լույս է տեսնում վինիլային ձայնասկավառակի և ձայներիզի տեսքով` ոչ մեծ խմբաքանակով:
1996թ. նոյեմբերին, գտնվելով ԱՄՆ-ում, Մեսչյանը ՀՀ ղեկավարությունից ստանում է հրավեր` զբաղեցնելու Երևանի գլխավոր ճարտարապետի պաշտոնը, սակայն 1997թ. հրաժարվում է Երևանի գլխավոր ճարտարապետի պաշտոնից և վերադառնում է Բոստոն: ԱՄՆ-ում Արթուր Մեսչյանը աշխատում է ճարտարապետական մի ընկերությունում և ղեկավարում այդ ընկերության բոլոր պրոյեկտների նախագծման աշխատանքները: 2001թ. լույս է տեսնում նրա երգերի հավաքածուն, որի մեջ ընդգրկված էին 4 ձայնասկավառակներ` «Ցնորված ջութակահարի մենախոսությունը», Catharsis-ը, Catharsis 2-ը և «Հաղորդությունը»:
2005թ. սեպտեբերին վերադառնում է հայրենիք: 2005-2006թթ. Արթուր Մեսչյանը տալիս է մի քանի համերգներ Երևանում, Գյումրիում և Վանաձորում:
2007-ին Մեսչյանի թարմացված պրոյեկտով վերսկսվում է Մեսրոպ Մաշտոցի անվան հնագույն ձեռագրերի գիտահետազաոտական ինստիտուտի` Մատենադարանի նոր մասնաշենքի շինարարությունը:
Չնայած երաժշտական ասպարեզում ունեցած մեծ հաջողություններին` այնուամենայնիվ ներկայում Արթուր Մեսչյանը չի շտապում ներկայացնել իր նոր աշխատանքերը:
2011թ. պարգևատրվել է «Սուրբ Մեսրոպ Մաշտոց» շքանշանով:
