Քաղաքական բեմականացման կամ չարի վերջը
Իշխանագողության անցած երեք տարիների ընթացքում ավազակապետական համակարգն էլ ավելի խորացրեց երկրում ստեղծված քաղաքական, տնտեսական, սոցիալական և բարոյահոգեբանական իրավիճակը: Արտաքին ու ներքին լրջագույն մարտահրավերները դիմակայելու անկարողությունն ու անճարակությունը, որով մեկ անգամ ևս վերահաստատվում է արտահերթ ընտրությունների անհրաժեշտությունը, իշխանության բոլոր թևերին մղում է իրականացնել իբր թե դրությունը շտկելուն ուղղված, մեդիայի պալատական ներկայացուցիչների իշխանանվեր ձոներգերով ուղեկցվող, խորհրդային ժամանակաշրջանի տարիների ավտորիտար ռեժիմին ու անձի պաշտամունքին հարիր բեմականացված միջոցառումներ, «շողշողացող» հավաքներ, «կարմիր ժապավեններ» կտրելու սին արարողություններ:
Բեմականացված միջոցառումներից «ամենատպավորիչը» ՀՀԿ 20-րդ տարեդարձին նվիրված հանդիսավոր նիստում Ս. Սարգսյանի ելույթն էր, որն ընթանում էր նրա ոտքերի տակ փռված Հայաստանի Հանրապետության պետական դրոշի ֆոնի վրա: Հանրապետության թիվ մեկ սիմվոլի նկատմամբ նման անարգանքը անասելի խայտառակություն է` հավասարազօր ազգային դավաճանությանը:
Քաղաքական բեմադրության ամենաանհաջող արարը՝ լի երգիծանքով և հումորով, պաշտոնանկությունների «շքերթն» էր: Միջոցառումների այդ շարքը չի կարելի չորակել որպես կլանի ներսում ուժերի ու կապիտալի վերաբաշխման ստվերային գործընթացների արտաքին դրսևորում, ինչն իր հերթին ներկայացվում է թե՛ ներքին և թե՛ արտաքին աշխարհին իբր կոռուպցիայի դեմ տարվող պայքարի փուլ: Իսկ պետական բյուջեից թալանված փողերը մնացին թալանողին` որպես պարգևատրում:
Քաղաքական բեմականացման հաջորդ արարը տեղի ունեցավ գործադիրի ճնշման տակ: Ազգային ժողովի արտահերթ նստաշրջանների ընթացքում «ժողովրդի ընտրյալները» մեկը մյուսի հետևից` մեկ շնչով, երեք ընթերցմամբ քննարկեցին ու ընդունեցին ոչ ավել, ոչ պակաս 130 օրինագիծ: «Քրտնաջան ու աշխատասեր» կոալիցիոն կուսակցություններն առանց աչք թարթելու կողմ քվեարկեցին ՀՀ քաղաքացիների շահերը ոտնահարող, «սոցիալական» կոչվող բյուջեից սոցիալապես կարիքավոր խավերին հատկացվող միջոցների հնարավորինս կրճատմանն ու, իհարկե, քրեաօլիգարխիկ համակարգի շահերը սպասարկող, նրանց գրպանների ուռճացմանն ուղղված այնպիսի օրենքների նախագծերի օգտին, ինչպիսիք են կուտակային կենսաթոշակային համակարգի մասին, հարկային, զբաղվածության, բնապահպանական, քաղաքաշինական օրենքներում փոփոխություններ ու լրացումներ կատարելու մասին օրենքները: Վայ-օրենսդիրների ամանորյա ամենամեծ նվերը հայ ժողովրդին «Լեզվի մասին» և «Հանրակրթության մասին» օրենքներում կատարված փոփոխությունների ընդունումն էր: Անտեսվեցին քաղաքացիական հասարակության հորդորները, հայրենասեր մտավորականության կոչերը: Քաղաքական կոալիցիան` նժդեհյան քաղաքական մեծամասնության առաջնորդությամբ, պարտադրեց մի փոփոխություն, որով շառաչյուն ապտակ հասցվեց հայեցի կրթությանը, մեր ազգային ինքնությանն ու ինքնասիրությանը: Արատավորվեց հայապահպանման սուրբ ուղին:
Եզրափակիչ արար: Մինչև կոկորդը կոռուպցիայի ու հանցագործության մեջ խրված քաղաքական կոալիցիան և նրանց հաճախորդները դարձել են երկրի անկախությանն ու ազգային անվտանգությանը սպառնացող լրջագույն վտանգը: Հետևաբար, օր առաջ նրանք պետք է հեռանան:
«Ժողովրդի իշխանություն» հասարակական-քաղաքական նախաձեռնություն