Թուրքական Dünya Bülteni կայքի փոխանցմամբ`Բոսնիա-Հերցեգովինայում ամենամեծ տպաքանակն ունեցող թերթերից Dnevni Avaz-ը Թուրքիայի արտգործնախարար Ահմեդ Դավութօղլուին ճանաչել է տարվա մարդ:
Թերթի խմբագիր Ֆարուք Վելեն հայտարարել է, որ Դավութօղլուն այդ պատվին արժանացել է Բալկանների և մասնավորապես Բոսնիա-Հերցեգովինայի խնդիրների նկատմամբ ցուցաբերած հետաքրքրության համար:
Ֆարուքի խոսքերով՝ դրան նպաստել է նաև այն, որ 2011 թվականին Դավութօղլուն այցելել է իրենց երկիր և անգամ ընտանիքի հետ Ռամադանի առաջին օրերն է անցկացրել այստեղ: Ֆարուքը հավելել է, որ այդ մրցանակը Դավութօղլուին կհանձնվի մոտ ապագայում, երբ նա կժամանի Բոսնիա-Հերցեգովինա: Ֆարուքը չի բացառել նաև, որ դա հանձնելու համար ինքը կարող է մեկնել Անկարա:
Հիշեցնենք, որ Դավութօղլուն 2009 թվականի աշնանը բոսնիական և սերբական կողմերի միջև միջնորդական առաքելության շրջանակներում առանձնազրույց էր ունեցել Բոսնիայի նախագահ Հարիս Միլաջիչի հետ։
Զրույցի ժամանակ Բոսնիայի ծխել սիրող նախագահը վառում է գլանակը, և զարմանալիորեն նույնն է անում ընդհանրապես չծխող, մոլեռանդ մուսուլման Դավութօղլուն, որը, սակայն, այս անգամ բացառություն է անում։ Արդյունքում՝ զրույցը դրական ելք է ունենում, և Դավութօղլուին հաջողվում է կատարել միջնորդի իր առաքելությունը։
Դրանից հետո եվրոպական դիվանագիտական շրջանակներում, ուր Դավութօղլուին անվանում են բոլորի հետ լեզու գտնել կարողացող մարդ, շրջանառության մեջ դրվեց «ծխել՝ ինչպես Դավութօղլուն» արտահայտությունը:
