ԱՄՆ նախագահ Բարաք Օբաման համոզված է, որ երկրում նոյեմբերին կայանալիք նախագահական ընտրությունները կընթանան թեկնածուների միջև քաղաքական սուր պայքարի մթնոլորտում: Այս մասին Սպիտակ տան ղեկավարը հայտարարել է իր նախընտրական քարոզարշավի համար միջոցներ հավաքող հիմնադրամի միջոցառմանը:
«Սրանք համառ ընտրություններ կլինեն: Մեզնից ոչ ոք հույս չունի, որ մրցարշավը հեշտ է լինելու»,- ասել է Օբաման: Ընդ որում, ԱՄՆ նախագահը նշել է, որ ներքին քաղաքականության, մասնավորապես՝ բյուջեին, հարկերին, կրթութան և գիտության ոլորտում ներդրումներին վերաբերող հարցերում իր կուսակցությունն ավելի շահավետ դիրքերում է, քան հանրապետականները:
Բացի այդ, Օբամայի խոսքերով՝ այս տարի հանրապետականները «ոչ մեծ խնդիրներ» ունեն արտաքին քաղաքականության ոլորտում: «Մենք կարողացաք ցույց տալ, որ կարելի է ունենալ կոշտ և ուժեղ արտաքին քաղաքականություն, որը պաշտպան է կանգնում ամերիկացիների շահերին, և միաժամանակ օգտագործել դիանագիտության միջոցներն ու վեճերը լուծել խաղաղ ճանապարհով, որը չի դիտվում որպես թուլության դրսևորում»- ասել է Սպիտակ տան ղեկլավարը:
Հիշեցնենք. ԱՄՆ-ում նախագահական ընտրությունները տեղի կունենան 2012 թ. նոյեմբերի 6-ին:
