Երեկ Բարսելոնում ավարտվել է բջջային տեխնոլոգիաների ոլորտում աշխարհի խոշորագույն Mobile World Congress 2012 ցուցահանդեսը,- հաղորդում է korrespondent.net-ը:
4 օրվա ընթացքում ավելի քան 50 հազար այցելուներ հնարավորություն են ունեցել ծանոթանալու աշխարհի խոշորագույն տեխնոլոգիական ընկերությունների մշակումներին: Ավանդաբար ներկա չի գտնվել նման միջոցառումներն արհամարհող Apple ընկերությունը:
Հարավկորեական Samsung ընկերությունը ներկայացրել է բջջային սարքերի նոր դասակարգի իր երկրորդ մոդելը՝ Galaxy Note 10.1-ը, որն աշխատում է Android 4 օպերացիոն համակարգով և Adobe Photoshop Touch-ի հնարավորություն ունի:
Բացի այդ, Samsung Electronics-ը MWC 2012-ին ներկայացրել է այս տարվա մեջ առաջին պլանշետները՝ Galaxy Tab 2 շարքի մոդելները, ինչպես նաև Galaxy S WiFi 4.2 մուլտիմեդիա նվագարկիչը:
Հարկ է նշել, որ ցուցահանդեսին ներկայացվել են մի քանի 4 միջուկանոց սմարթֆոններ, որոնց հիմնական առավելությունը աշխատանքի արագությունն է: Այցելուների ուշադրությանն է ներկայացվել Huawei Ascend D quad (ըստ արտադրողի՝ այն աշխարհի ամենաարագ աշխատող սմարթֆոնն է), LG Optimus HD 4X, HTC One X և ZTE Era մոդելի սմարթֆոնները:
Սմարթֆոնների շուկայում արագ ընդլայնվող HTC ընկերությունը ներկայացրել է One V և One C սարքերը և դիզայնով տարբերվող One X-ը: Panasonic ընկերությունը ներկայացրել է Eluga սմարթֆոնը:
Բացի այդ, Sony-ն Ericsson-ից առանձնանալուց հետո առաջին անգամ ներկայացրել է իր առաջին սմարթֆոնները՝ Xperia P և Xperia U:
Ցուցահանդեսին մասնակցել է նաև Microsoft-ը, որը ներկայացրել է իր Windows 8 ՕՀ-ն:
Միջոցառման կարևոր իրադարձություններից էր Samsung Electronics ընկերության նախագահի հայտարարությունը, ըստ որի՝ ընկերությունը պատրաստվում է 2012 թ. կրկնակի ավելացնել սմարթֆոների վաճառքը:
