Թուրքական Anadolu գործակալության փոխանցմամբ`ԱՄՆ պետքարտուղար Հիլարի Քլինթոնը ելույթ է ունեցել Ներկայացուցիչների պալատի նիստում, որում անդրադարձել է երեքշաբթի Ֆրանսիայի Սահմանադրական խորհրդի կայացրած որոշմանը, որով հակասահմանադրական ճանաչվեց Հայոց ցեղասպանության հերքումը քրեականացնող օրինագիծը.
«Ես կարծում եմ, որ խոսքի քրեականացումը կարող է վտանգավոր ճանապարհ բացել: Որքան հասկանում եմ՝ ֆրանսիական դատարանն այն ճանաչել է հակասահմանադրական: 1915 թվականի իրադարձությունները 20-րդ դարի ամենասարսափելի սպանդներից են: ԱՄՆ նախագահն ամեն տարվա ապրիլի 24-ին հարգանքի տուրք է մատուցում զոհերի հիշատակին և իր աջակցությունը հայտնում հայ ժողովրդին:
Նախորդ տարվա ապրիլքսանչորսյան իր ելույթում նախագահ Բարաք Օբաման հայտարարեց, որ բոլորի շահերից է բխում այդ փաստերի լիարժեք, սրտանց և արդարացի ճանաչման հասնելը: Բացի այդ, նա հավելեց, որ այդ նպատակին հասնելու ամենալավ ճանապարհն այն է, որ հայ և թուրք ժողովուրդներն անցյալում տեղի ունեցած իրողությունները դիտարկեն որպես դեպի առաջ ընթանալու իրենց ջանքերի մաս: Նախորդ նախագահների նման Օբաման նույնպես ջանադիր աջակցում է հայ-թուրքական հարաբերությունների կարգավորմանը»:
Հիշեցնենք, որ ներկայումս ամերիկացի 61 կոնգրեսականներ ստորագրել են մի նամակի տակ, որում իրենց անհամաձայնությունն են հայտնել Հայոց ցեղասպանության հարցում ԱՄՆ պետքարտուղար Հիլարի Քլինթոնի որդեգրած դիրքորոշման հետ:
Դա մասնավորապես վերաբերում է ոչ վաղ անցյալում Քլինթոնի հնչեցրած այն հայտարարությանը, թե «Հայոց ցեղասպանությունը համարվում է պատմական հարց» (այսինքն՝ դրանով պետք է զբաղվեն միայն պատմաբանները): Բացի այդ, նամակում Հիլարի Քլինթոնը որակված է որպես ամերիկյան դիվանագիտության ամենաթուրքամետ ներկայացուցիչ:
