Բրիտանական լեգենդար The Beatles խմբի անդամներ Ջոն Լենոնի և Փոլ Մաքքարտնիի` Լիվերպուլում գտնվող առանձնատներին տրվել է պետության կողմից պահպանվող հուշարձանի կարգավիճակ: Այս մասին Լիվերպուլում հայտարարել է Մեծ Բրիտանիայի զբոսաշրջության և մշակութային ժառանգության հարցերով նախարար Ջոն Փենրոուզը:
«Դա նշանակում է, որ տները պետք է պահպանվեն, որպեսզի հաջորդ սերունդները հնարավորություն ունենան գալ այստեղ ու վայելել՝ ինչպես հիմա»,- նկատել է Փենրոուզը:
«Beatles-ը մեծ նշանակություն ունի ոչ միայն Լիվերպուլի ու Մեծ Բրիտանիայի համար: Նրանց ազդեցությունը մինչ օրս էլ զգալի է տարբեր ուղղության երաժշտական խմբերի վրա»,- հավելել է նա:
Լենոնի պատանության 20 տարիները սերտորեն առնչվում են Մենլավ ավենյուում գտնվող Մենդիպս առանձնատան հետ, որտեղ նա ապրել է 1945-1963 թթ.:
«Մենդիպսը շատ մեծ նշանակություն ուներ Ջոնի համար: Այստեղ են նրա մանկական երազանքները դարձել իրականություն ինչպես նրա, այնպես էլ ամբողջ աշխարհի համար»,- ասել է երաժշտի այրին` Յոկո Օնոն:
Իսկ Ֆորտլին ռոուդ փողոցում գտնվող թիվ 20 տանը Մաքքարտինին ապրել է 9 տարի` սկսած 1955-ից: Այստեղ են բիթլները հաճախ կատարել իրենց փորձերն ու ձայնագրել ամենահայտնի ստեղծագործությունները:
Երաժիշտների տներն այսուհետ կփրկվեն անհարկի շինարարությունից և ցանկացած միջամտությունից: Այս մասին հայտնում է ITAR TASS գործակալությունը:
