Միասնական տեղեկատվական համակարգը մինչև այս տարվա հուլիս կփորձարկվի, որից հետո կգործարկվի ամբողջությամբ և հնարավորություն կտա հստակեցնել կենսաթոշակառուների հաշվառումը, տվյալները կինեն ճշգրիտ, նույնականացվող, և համակարգը պետք է գործի ինքնաշխատ ձևով:
Ինչպես այսօր ասուլիսում հայտնեց ՀՀ աշխատանքի և սոցիալական հարցերի փոխանախարար Արտեմ Ասատրյանը, համակարգի ներդրումը թույլ է տվել ծառայություններն ավելի մատչելի դարձնել և ներկայում մոտ 100 հազար թոշակառուներ իրենց կենսաթոշակը ստանում են բանկային համակարգով, ընդ որում` քարտի սպասարկման գումարը չի գանձվում կենսաթոշակառուից: Այս տարվա հունվարի 1-ի դրությամբ ճշգրտումների արդյունքում՝ կենսաթոշակառուների թիվը 520 հազարից նվազեց մինչև 509 հազարի:
«Քաղաքացիները շատ դեպքերում առնչվում են քաշքշուկների, կենսաթոշակի անցնելու ժամանակ ստաժի փաստաթղթերի ներկայացման առումով խնդիրներ են ունենում: Այս միասնական տեղեկատվական համակարգում պետք է ամբողջացվեն այդ տվյալները»,- ասաց Ա. Ասատրյանը` հավելելով, որ քաղաքացիները պետք է պահանջեն, որ գործատուները ներկայացնեն իրենց վերաբերյալ տվյալները:
ԱԺ սոցիալական հարցերի մշտական հանձնաժողովի նախագահ Հակոբ Հակոբյանը հայտարարեց, որ երբ քաղաքացիներն անցնում են թոշակի, պետք է միայն հայտնեն այդ ցանկության մասին. «Մեր հետագա քաղաքական նպատակը լինելու է, որ ՀՀ քաղաքացին ոչ մի տեղ չդիմի: Ունի՞ կենսաթոշակային տարիք, ցանկանո՞ւմ է ստանալ, ուրեմն պետք է գնա սոցիալական ինտեգրված ծառայություն և միայն դիմում գրի»,- ասաց Հ. Հակոբյանը:
