Հայ-շվեյցարական ընկերության պատվո նախագահ Սարգիս Շահինյանը Ֆրանսիայի Սահմանադրական խորհրդի՝ հայկական օրինագծի առնչությամբ այսօր կայացնելիք վճռից որևէ ակնկալիք չունի: Այս մասին նա ասաց «Առաջին լրատվական»-ի հետ զրույցում:
«Ինչո՞ւ պետք է Հայոց կամ որևէ այլ ցեղասպանության ժխտումը դատապարտվի այս կամ այն երկրի կողմից: Ես անհասկանալի եմ համարում, թե ինչու մարդիկ պետք է կասկածներ ունենան այս տեսակ օրինագծի սահմանադրական ուժի առնչությամբ, երբ առաջին հերթին պետք է պահպանել մարդու արժանապատվությունը: Սա ամենակարևորն է: Բուն խնդիրն այն է, որ այս ամենը քաղաքական բնույթ է ստացել և խաղ է տարվում՝ ո՞վ ավելի մեծ ազդեցություն ունի ուրիշների վրա՝ այս դեպքում հայե՞րը, թե՞ թուրքերը»,- նկատեց Սարգիս Շահինյանը:
Հարցին՝ արդյո՞ք ֆրանսիական կողմը կտրվի թուրքական սադրանքին, Հայ-շվեյցարական ընկերության պատվո նախագահը պատասխանեց. «Իհարկե, պետք է տրվի: Թուրքերը կարողացան մեծ թվով մարդկանց վրա ազդեցություն բանեցնել: Իրողությունն այն է, որ Հայոց ցեղասպանության ժխտողականությունն իրականացվում է բոլոր օղակներով: Բոլոր օղակները, որոնք ուզում էին ժխտել Ցեղասպանությունը, հաջողեցին իրենց գործի մեջ: Իմ ամենակարևոր եզրակացությունն այն է, որ հայերը այս տեսակ որոշումից ոչ մի սպասելիք չպետք է ունենան: Նրանք պետք է սպասելիքներ ունենան միմիայն իրենց կամքից բխած գործունեությունից, իսկ այս ամենն իրենց կամքից դուրս բխած նախաձեռնություն էր: Մենք հավաքական վճռականություն և գործունեություն չծավալեցինք, որպեսզի պահպանենք մեր ազգային շահերը: Մենք դա չենք անում Հայաստանում, ուր մնաց արտասահմանում: Ուրեմն ինչպե՞ս սպասենք, որ ուրիշները մեր փոխարեն անեն դա: Մեր իրավունքները մենք ինքներս պետք է պաշտպանենք: Մինչև ազգային ծրագիր չունենանք, այսօրինակ սադրանքների ենք ենթարկվելու: Հայկական կողմը ոչ մի առաջադրում չարեց, միմիայն պարապ խոսեց, իսկ թուրքական կողմը մակարդակով, հատուկ ծրագրով գործեց: Թուրքերը շատ լավ գիտեն՝ ում վրա պիտի ճնշումներ գործեն, ինչ տեսակ միջոցներ հայթայթեն»,- ամփոփեց Սարգիս Շահինյանը:
Նշենք, որ Ֆրանսիայի Սահմանադրական խորհուրդն այսօր` փետրվարի 28-ին, պետք է իր եզրակացությունը ներկայացնի ցեղասպանությունների մասին օրենքի սահմանադրությանը համապատասխանելու հարցի վերաբերյալ: Խոսքը ցեղասպանությունների, այդ թվում Հայոց ցեղասպանության ժխտումը քրեականացնող օրենքի մասին է:
Հիշեցնենք, որ հունվարի 23-ին մոտ 8 ժամ տևած լարված քննարկումներից հետո Ֆրանսիայի Սենատը 127 կողմ և 86 դեմ ձայներով ընդունեց այդ երկրի կողմից ճանաչված ցեղասպանությունների ժխտումը քրեականացնող օրինագիծը: Սակայն արդեն հունվարի 31-ին հայտնի դարձավ, որ ֆրանսիացի 76 սենատորներ դիմել են Սահմանադրական խորհուրդ՝ պահանջելով սահմանափակել Հայոց ցեղասպանության ժխտման համար քրեական պատիժ սահմանող օրենքը:
Օրենքը ցեղասպանությունների մերժման դեպքում նախատեսում է 45 հազար եվրո տուգանք և մեկ տարի ազատազրկում:
