Ֆրանկֆուրտի օդանավակայանի սեփականատեր Fraport AG ընկերությունը պատրաստվում է դատի տալ հերթական հնգօրյա գործադուլի մասնակիցներին, ինչի հետևանքով հետաձգվել են հարյուրավոր չվերթներ:
Ինչպես հաղորդդում է Reuters գործակալությունը, ընկերությունը հայտարարել է, որ պատրաստվում է նման քայլի դիմել այն բանից հետո, երբ GdF արհմիությունը կոչ է արել ավիադիսպետչերներին միանալ գործադուլին: Այդ դեպքում Եվրոպայի խոշորագույն օդանավակայաններից մեկը կարող կաթվածահար լինել:
«Այդ գործողությունները իրավիճակի վրա լրջորեն կազդեն ոչ միայն Գերմանիայում, այլև ամբողջ աշխարհում»,- ասել է Fraport-ի ներկայացուցիչը:
Ընկերությունը կոչ է արել ավիադիսպետչերներին հրաժարվել մասնակցել գործադուլին: Հակառակ դեպքում օդանավակայանի սեփականատերը սպառնում է դատական հայց ներկայացնել արհմիությունների և գործադուլի մասնակիցների դեմ և օգտագործել ժամանակավոր աշխատակիցների ներուժը:
Հիշեցնենք, որ Ֆրանկֆուրտի օդանավակայանի աշխատակիցները պահանջում են բարձրացնել իրենց աշխատավարձը և բարելավել աշխատանքի պայմանները:
