Ամերիկացի կոնգրեսականները կոչ են անում պետքարտուղար Հիլարի Քլինթոնին վերանայել դիրքորոշումը Հայոց ցեղասպանության խնդրում` վերջերս նրա արտահայտած մոտեցումները որակելով որպես «ակնհայտ թուրքամետ»: Այս մասին տեղեկացնում է «Ազատություն» ռադիոկայանը:
Երկուշաբթի երեկոյան Վաշինգտոնում հրապարակվել է Կալիֆոռնիայից ընտրված դեմոկրատ Ադամ Շիֆի և Իլինոյսը ներկայացնող հանրապետական Ռոբերտ Դոլդի` Պետդեպարտամենտի ղեկավարին ուղղված նամակը, որին միացել են մոտ վեց տասնյակ այլ կոնգրեսականներ:
«Վերջին տարիներին բարձրաստիճան ամերիկացի դիվանագետներից և ոչ մեկի դիրքորոշումները այդքան մոտ չեն եղել թուրքական կառավարության մոտեցումներին, որքան պետքարտուղար Քլինթոնինը»,- նշում են նամակի հեղինակները:
Դեմոկրատ և հանրապետական կոնգրեսականները համատեղ այս ուղերձում խիստ քննադատության են ենթարկում պետքարտուղար Քլինթոնին հատկապես այն հայտարարությունների համար, որոնց համաձայն` «Ցեղասպանության հարցը անհրաժեշտ է թողնել պատմաբանների դատին»:
«Պատմական տեսանկյունից մեծագույն սխալ է պնդել, թե Ցեղասպանության հարցը դեռ քննության առարկա է: Դա ոչ միայն վիրավորանք է ամերիկահայերի և ցեղասպանության այլ զոհերի հասցեին, այլև յուրատեսակ ամերիկյան խրախուսում ժխտողականության այն ամոթալի քաղաքականությանը, որ որդեգրել է թուրքական հանրապետությունը»,- նշում են նամակի հեղինակները` նաև տարակուսելով, թե ինչպես կարող էր մի քանի տարվա ընթացքում Հիլարի Քլիթոնի տեսակետը այս խնդրում փոխվել 180 աստիճանով:
«Հարկ է հիշեցնել, որ 2006-ին Սենատի անդամներ Հիլարի Քլինթոնն ու Բարաք Օբաման մի ուղերձի տակ էին ստորագրել, որում, մասնավորաբար, գրված էր. «1915 թվականի իրադարձությունները Օսմանյան Թուրքիայում բնակվող հայերի հանդեպ իրականացված համակարգված ու կանխամտածված Ցեղասպանություն էին: 1915 թվականի Ցեղասպանությունն իր պատշաճ տեղը պետք է զբաղեցնի համաշխարհային պատմության էջերում: Միացյալ Նահանգների և ողջ միջազգային հանրության շահերից է բխում, որ մենք հստակ դասեր քաղենք այդ իրադարձություններից` թույլ չտալով, որ իրադաձությունները երբևիցե կրկնվեն», – 2006-ին գրված Քլինթոնի նամակից նման մեջբերում են կատարում ամերիկացի կոնգրեսականները:
Հայ դատի Վաշինգտոնի գրասենյակի ղեկավար Արամ Համբարյանն էլ բավական բարձր է գնահատել կոնգրեսականների այս ուղերձը` նշելով. «Մենք շնորհակալ ենք կոնգրեսականներ Շիֆին և Դոլդին, ինչպես նաև նրանց նախաձեռնությանը միացած մյուս օրենսդիրներին` պետքարտուղար Քլինթոնին ուղղված այս կոչի համար, որով նրանք պահանջում են հրաժարվել ամերիկահայերի համար խիստ վիրավորական պնդումներից, թե Ցեղասպանության հարցը պատմաբանների քննության առարկա է»:
«Մենք հուսով ենք, որ նման կեղծ հայտարարություն հնչեցնելուց հետո պետքարտուղար Քլինթոնը հաշվի կառնի կոնգրեսականների ուղերձն ու ամերիկահայ համայնքի ցասումը` վերանայելով իր դիրքորոշումն ու փորձելով մեղմել այդ հայտարարության բացասական հետեւանքները», – ասել է Համբարյանը:
Երեքշաբթի ԱՄՆ-ի Կոնգրեսի մի շարք հանձնաժողովներում մեկնարկում է արտաքին հարաբերություններին նվիրված լսումների շարք, որոնց մասնակցելու է նաև պետքարտուղար Քլինթոնը: Ամերիկահայ կազմակերպությունները կոչ են անում Քլինթոնին ուղղված երեկվա ուղերձի հեղինակներին ու աջակիցներին` Հայոց ցեղասպանության հարցը բարձրացնել նաև այդ լսումների ընթացքում:
«Կոչ ենք անում կոնգրեսականներին` ուղղակիորեն դիմել պետքարտուղար Քլինթոնին` նրանից բացատրություն պահանջելով «պատմաբանների քննարկման» մասին վիրավորական հայտարարությունների համար»,- նշված է Հայ դատի Վաշինգտոնի գրասենյակի տարածած հայտարարության մեջ:
