Wikileaks կայքի կողմից օրերս հրապարաված «Ստվերային ԿՀՎ-ի»՝ ամերիկյան հետախուզական վերլուծական Strategic Forecasting Inc. (Stratfor) ընկերության աշխատակիցների ներքին գաղտնի նամակագրական նյութերում բացահայտվել են անցյալ տարվա մայիսին սպանված Ուսամա Բեն Լադենի որոշ գաղտնիքներ:
Եթե հավատանք Stratfor-ի աշխատակիցների նամակագրությանը, ապա պարզվում է, որ «համար մեկ ահաբեկիչը» Պակիստանում ապրելու տարիներին մշտապես կապ է պահպանել Պակիստանի ռազմական հետախուզության բարձրաստիճան ներկայացուցիչների հետ: Ինչպես հայտնի է, Բեն Լադենը սպանվել է 2011 թ. մայիսին Պակիստանի Աբոթաբադ քաղաքում:
Հրապարակված հաղորդագրություններից մեկի համաձայն՝ Պակիստանի հետախուզության առնվազն 12 աշխատակից տեղյակ էին՝ որտեղ է ապրում Բեն Լադենը,- գրում է բրիտանական The Telegraph-ը: Չնայած այդ պաշտոանատար անձնանց անունները չեն նշվում, սակայն ասվում է, որ նրանք հայտնի են, և այժմ ԱՄՆ-ը կարող է օգտագործել այդ տեղեկությունը որպես խաղաքարտ՝ Իսլամաբադի հետ բանակցություններում:
Նշենք, որ թեև ԱՄՆ-ը բազմիցս նշել է, որ Պակիստանի իշխանություններն իմացել են Բեն Լադենի գտնվեու վայրը, պաշտոնական Իսլամաբադը կտրականապես հերքում է այդ մեղադրանքները:
