Գյումրիում հացի գնի 10-20 դրամով բարձրացումը պայմանավորում են ալյուրի թանկացմամբ. 50 կգ-ոց 1 պարկ ալյուրի գինը բարձրացել է 600-700 դրամով: Սակայն տարօրինակ է, որ հացի թանկացում դեռ չի դիտարկվել Երևանում, քանի որ, ըստ ավանդույթի, թանկացումները սկսվում են հենց մայրաքաղաքում ու հետո տարածվում շրջաններում:
Սպառողների ասոցիացիայի նախագահ Արմեն Պողոսյանն «Առաջին լրատվական»-ի հետ զրույցում «սովորական տրամաբանությունից և օրինաչափությունից դուրս» անվանեց այս թանկացումը: Սակայն, ըստ նրա, կան նաև թաքնված օրինաչափություններ, որ որքան կենտրոնից, աչքից հեռու է, այնքան կամայականությունները շատ են լինում: Ալյուրի թանկացումը Ա. Պողոսյանը պայմանավորեց նաև եղանակային պայմաններով՝ ճանապարհների վիճակը վատ է եղել և բեռնափոխադրողներն են խնդիր ունեցել, քանի որ Գյումրին էլ բավականին բարձրադիր է:
«Գյումրին ինքը, այսինքն՝ Շիրակի դաշտավայրը, հայտնի է եղել իր ցորենով, չնայած ՀՀ-ում հիմա ցորենի արտադրությունն այնքան քիչ է, որ ցորենի պահանջարկի 40%-ն էլ չի բավարարում, և հիմնականը ներկրվում է: Մենք անհեռատես քաղաքականության պտուղներն ենք քաղում: Գյումրին ինքը կարող էր իրեն կերակրել: Իսկ 10-20 դրամը, թվում է, փոքր թիվ է, բայց դա էականորեն ազդում է անապահով խավի բյուջեի վրա և անհնար է դարձնում արժանապատիվ ապրելու հեռանկարը»,- ասաց Ա. Պողոսյանը:
