Կիրակի օրը կայացավ Իտալիայի առաջնության 19-րդ տուրը: Մեկնարկային խաղում «Ռոմա»-ն հյուրընկալվելիս 2:1 հաշվով պարտություն կրեց «Սամպդորիա»-ից: Հանդիպման 18-րդ րոպեին Միրկո Վուչինիչը առաջ մղեց հյուրերին, 58-րդ րոպեին Նիկոլա Պոցցին 11-մետրանոց հարվածով վերականգնեց հաշվի հավասարակշռությունը, իսկ 85-րդ րոպեին Ստեֆանո Գուբերտին խփեց հաղթական գոլը: Ընդհանուր առմամբ հանդիպումը շատ կոպիտ ստացվեց. Մրցավարը 7 դեղին և 3 կարմիր քարտ ցույց տվեց թիմերին: 56-րդ րոպեին վերջին հույսի խախտման համար խաղադաշտից հեռացվեց «Ռոմա»-ի դարպասապահ Ժուլիո Սերժիոն, իսկ 87-րդ և 91-րդ րոպեներին հեռացվեցին «Սամպդորիա»-ի ֆուտբոլիստներ Լուկինին և Գաստալդելլոն:
Առաջատար «Միլան»-ը չկարողացավ առավելության հասնել «Ուդինեզե»-ի նկատմամբ: «Սան-Սիրո» մարզադաշտում հավաքված երկրպագուներն իսկական թրիլերի ականատես դարձան. Հանդիպման ընթացքում խփած 8 գոլերն այդպես էլ ի հայտ չբերեցին հաղթողին: 35-րդ րոպեին «Ուդինեզե»-ի հարձակման առաջատար Անտոնիո Դի Նատալեն առաջ մղեց իր թիմին, առաջին խաղակեսի վերջին րոպեին պատասխան գոլի հեղինակ դարձավ Պատոն: 53-րդ և 66-րդ րոպեներին Սանչեսն ու նույն Դի Նատալեն հաշիվը դարձրեցին 1:3: 12 րոպե անց Բենատիան դարձավ ինքնագոլի հեղինակ, ևս 4 րոպե անց Պատոն հավասարեցրեց հաշիվը: Հիմնական ժամանակի ավարտից մեկ րոպե առաջ Դենիսը կրկին առաջ մղեց հյուրերին: Թվում էր` «Ուդինեզե»-ն Միլանից 3 միավոր կտանի, բայց մրցավարի ավելացրած ժամանակում իր խոսքն ասաց Զլատան Իբրահիմովիչը` 4:4:
«Ինտեր»-ը` Լեոնարդոյի գլխավորությամբ, տարավ երկրորդ անընդմեջ հաղթանակը: «Կատանիա»-ի հետ ամբողջ խաղում միլանցիները տարածքային և խաղային առավելություն ունեին, բայց հանդիպման հաշիվը 71-րդ րոպեին բացեցին տանտերերը, այդուհանդերձ 75-րդ և 79-րդ րոպեներին Կամբիասսոյի հեղինակած դուբլի շնորհիվ «Ինտեր»-ին հաջողվեց հաղթանակ տանել` 1:2:
«Նապոլի»-ն 3:0 հաշվով ջախջախեց «Յուվենտուս»-ին և մրցաշարային աղյուսակում բարձրացավ երկրորդ հորիզոնական, Էդիսոն Կավանին դարձավ հեթ տրիկի հեղինակ:
Մյուս հանդիպումներում գրանցվեցին հետևյալ արդյունքները` «Բարի»-«Բոլոնիա»` 0:2, «Չեզենա»-«Ջենոա»` 0:0, «Կևո»-«Պալերմո»` 0:0, «Ֆիորենտինա»-«Բրեշիա»` 3:2, «Լացիո»-«Լեչե»` 1:2, «Պարմա»-«Կալյարի»` 1:2:
