Սիրիայի Հոմս քաղաքում տասնյակ զինյալներ դադարեցրել են դիմադրությունը և հանձնվում են իրավապահներին: Այս մասին հայտնում է Սիրիայի պետական Suriya հեռուստաալիքը:
Հեռուստաալիքը հիշեցնում է, որ մի խումբ ահաբեկիչներ երկար ժամանակ իրենց ձեռքում էին պահում քաղաքի մի քանի թաղամասեր: Բնակիչների պահանջով կարգուկանոն վերականգնելու համար փետրվարի սկզբին այստեղ զորք է մտցվել:
Դեռ առավոտյան քաղաքում շարունակվում էր փոխհրաձգությունը: Զինյալները հարձակումներ էին գործում Համիդիա թաղամասի ռազմական պարեկների վրա, ինչի հետևանքով զոհվել է մեկ, վիրավորվել 2 զինծառայող: Սիրիական հեռուստաալիքն ուղիղ հեռարձակում է միացրել Հոմսից, որտեղ լռություն է տիրում:
Կատարյան Al-Jazeera հեռուստաալիքն իր հերթին ուղիղ եթերով ռեպորտաժներ է ցուցադրում այն շրջաններից, որտեղ շարունակվում են բախումները զինվորականների և ընդդիմադիրների միջև:
Նշենք, որ այս պահին Թունիսում ընթանում է «Սիրիայի բարեկամներ» խմբի կոնֆերանսը, որում շեշտը դրվում է երկրում հումանիտար դրության վատթարացման վրա: Մասնավորապես Սիրիայի ազգային խորհրդի պատվիրակությունը, որը նույնպես հրավիրված է կոնֆերանսին, պահանջում է անհապաղ մարդասիրական օգնություն ուղարկել «աղետի գոտի», որպիսին բացի Հոմսից, համարվում են Իդլիբը, Համան և Դարաան:
Այսօր հերթական «ցասման ուրբաթ»-ին Կամիշլիի փողոցներ են դուրս եկել քրդերը, որոնք բացի բռնությունները դադարեցնելու կարգախոսներից պահանջել են դաշնայնացնել երկիրը և ազգային փոքրամասնություններին ինքնուրույնություն տալ:
Կատարյան հեռուստաալիքի հաղորդմամբ՝ ցույցեր են տեղի ունեցել նաև Դամասկոսում, որտեղ ոստիկանությունը ցրել է այն: Նշվում է, որ Հալեպում ոստիկանությունը կրակ է բացել ցուցարարների վրա: Հուզումներ են տեղի ունեցել ուսանողական ճամբարներում, որտեղ ոստիկանությունն արցունքաբեր գազ է կիրառել:
Այնուամենայնիվ, Suriya-ն ամբողջությամբ հերքում է այս տեղեկությունները:
Սիրիայում արդեն մոտ մեկ տարի շարունակվում է հակամարտությունը կառավարական ուժերի և ընդդիմության միջև: Այդ ընթացքում, ՄԱԿ-ի վերջին տվյալներով, զոհվել է 8000 մարդ:
