Իսպանիայի առաջնության 18-րդ տուրի մեկնարկային խաղում «Լա Ռոսալեդա» մարզադաշտում «Մալագա»-ն ընդունեց Բիլբաոյի «Ատլետիկ»-ին և հանդիպման վերջին րոպեին ձեռքից բաց թողեց հաղթանակը: Հավասար պայքարում անցած հանդիպումն ավարտվեց ոչ-ոքի` 1:1 հաշվով: 81-րդ րոպեին «Մալագա»-ի նորեկ Դեմիկելիսի խփած գնդակին մրցավարի ավելացրած ժամանակում պատասխանեց բասկերի կիսապաշտպան Մարտինեսը:
Հաջորդ հանդիպումը կայացավ Սան-Սեբաստյանի «Անոետա» մարզադաշտում, որտեղ «Սևիլյա»-ն կամային հաղթանակ տարավ «Ռեալ Սոսյեդադ»-ի նկատմամբ: Առաջին խաղակեսից հետո տանտերերն առջևում էին 2:1 հաշվով, բայց երկրորդ խաղակեսի ընթացքում Սևիլյայի ֆուտբոլիստներին հաջողվեց երկու անպատասխան գնդակ ուղարկել «Սոսյեդադ»-ի դարպասը. գրանցվեց 2:3 հաշիվը, դուբլի հեղինակ դարձավ Կանուտեն:
Օրվա վերջին խաղում «Բարսելոնա»-ն հյուրընկալվեց Միգել Անխել Լոտինայի «Դեպորտիվո»-ին և հերթական հեշտ հաղթանակը տարավ: Եթե տասը տարի առաջ ոչ-ոք չէր կարող կանխատեսել, թե ինչպես կավարտվի «Բարսելոնա»-ի այցը «Ռիասոր», ապա վերջին ժամանակներս միակ հարցը, որ ծագում է այս թիմերի հանդիպման ժամանակ, այն է, թե քանի գոլի տարբերությամբ կհաղթի Գվարդիոլայի թիմը: Այս անգամ գրանցվեց 4 գոլի տարբերություն` 0:4: Հանդիպման 26-րդ րոպեին Մեսսիի փոխանցումից հետո հաշիվը բացեց Վիլյան, ով «Դեպորտիվո»-ի հետ անցկացրած 14 խաղերում խփեց իր 11-րդ գնդակը: Եվս 26 րոպե անց Մեսսին չափազանց գեղեցիկ և դիպուկ իրացրեց իր վաստակած տուգանային հարվածը: 80 և 81-րդ րոպեներին Ինիեստան և Պեդրոն հաշիվը դարձրեցին խոշոր:
18-րդ տուրի մյուս հանդիպումները կկայանան այսօր: Հատկապես մեծ հետաքրքրություն է առաջացնում մրցաշարային աղյուսակի երկրորդ և երրորդ տեղերում ընթացող Մադրիդի «Ռեալ»-ի և «Վիլյառեալ»-ի դիմակայությունը:
