Այսօր «Կոնգրես» հյուրանոցում Քաղաքական և միջազգային հետազոտությունների հայկական կենտրոնը կազմակերպել էր քննարկում` «Ինչ սկզբունքներով են ձևավորվում նախընտրական ցուցակները» թեմայի շրջանակներում։ Քննարկմանը մասնակցում էին տարբեր քաղաքական ուժերի ներկայացուցիչներ:
Որքանո՞վ է կուսակցության ցուցակը կազմվում առաջնորդի ցանկությամբ, արդյոք այդ ցուցակը չի՞ բերի պառակտումների, և ինչպիսի՞ կադրային բազա ունեն կուսակցությունները. այս հարցերին էին փորձում պատասխանել կուսակցությունների ներկայացուցիչները:
ԲՀԿ ներկայացուցիչ Վահե Էնֆիաջյանը նշեց, որ ԲՀԿ-ի համար հստակ է, թե իրենց ցուցակում ով է լինելու առաջինը. դա Գագիկ Ծառուկյանն է։ Նրանք ցուցակը քննարկում են տարածքային կազմակերպություններում: ԲՀԿ ներկայացուցիչը կարևորեց սերնդափոխության գաղափարը՝ իրենք Երիտասարդական համաժողով են անցկացրել և հանգել են այն եզրակացության, որ ԲՀԿ համամասնական ցուցակում նվազագույնը 20 տոկոս երիտասարդներ կլինեն:
Անդրադառնալով ՀՀ ԱԳ նախկին նախարար Վարդան Օսկանյանի՝ իրենց կուսակցությանն անդամագրվելու փաստին՝ Վահե Էնֆիաջյանը նկատեց. «Նա բավականին փորձառու, հարգանք վայելող գործիչ է, իսկ թե որ հորիզոնականը կզբաղեցնի` կորոշի կուսակցության խորհուրդը»:
«Ազատ դեմոկրատներ» կուսակցության ներկայացուցիչ Անուշ Սեդրակյանը նշեց, որ Հայաստանին անհրաժեշտ են փոփոխություններ. «Քաղաքական սկզբունքները պաշտպանող անհատներ պետք է լինեն ցուցակներում: Մեր ցուցակի կազմման հիմքում բացարձակ կոլեգիալությունն է ընկած: Ժամանակն է լիդերապաշտ քաղաքականությունից անցնել հանրային քաղաքականության»:
ՀԱԿ ներկայացուցիչ Սամվել Աբրահամյանը անդրադառնալով ՀԱԿ համամասնական ցուցակը կազմելու իրենց սկզբունքներին՝ նշեց, որ ՀԱԿ-ը առանձնահատուկ է այն իմաստով, որ 18 կուսակցությունների միություն է և ներկայացնում է համաժողովրդական շարժում, ուստի ավելի է բարդ է ցուցակի ձևավորման ընթացքը:
«Մեզ համար ԱԺ ընտրությունները պարզապես ընտրություններ չեն, դրանք միջոց են` սահմանադրական կարգը վերականգնելու և Սերժ Սարգսյանի հրաժարականին հասնելու: Մեզ համար ավելի կարևոր է ընտրել մի մեխանիզմ, որը կնպաստի գլխավոր խնդրի լուծմանը` սահմանադրական կարգի վերականգնմանը: Այդ մեխանիզմների ընտրության շուրջ ՀԱԿ-ում քննարկումներ են ընթանում»,- նկատեց Ս. Աբրահամյանը: