«Առաջին լրատվականը» երեկ ուշ գիշեր տեղեկացրել էր, որ Արիզոնա նահանգի Թաքսոն քաղաքում տեղի ունեցած հրաձգության հետևանքով զոհվել էր վեց մարդ: Վիրավորների թվում էր նաև ԱՄՆ Ներկայացուցիչների պալատի անդամ, Դեմոկրատական կուսակցության ներկայացուցիչ, 40-ամյա կոնգրեսական Գաբրիել Գիֆորդսը:
Երեկ Գիֆորդսին ենթարկել են վիրահատության: Ինչպես հայտնում են ամերիկյան լրատվամիջոցները, կոնգրեսականն արդեն ուշքի է եկել: Նրա հետ են ընտանիքի անդամները: Տեղեկացնենք, որ Գիֆորդսի ամուսինը հայտնի տիեզերագնաց Մարկ Քելին է, ով նախապատրաստվում էր հերթական թռիչքին, սակայն իմանալով դեպքի մասին` վերադարձել է Արիզոնա:
Արդեն հայտնի է դարձել հանցագործի ինքնությունը. դա 22-ամյա Ջեյրդ Լի Լաֆներն է: Ինչպես իրավապահները պարզել են նրա ինտերնետ բլոգից և անձնական այլ գրառումներից, Լոքները դեմ է եղել ներկայիս վարչակազմին և միշտ քննադատաբար է արտահայտվել դեմոկրատների գործողությունների վերաբերյալ: Չնայած երիտասարդ տարիքին` նա հասցրել է ծառայել, եղել է Աֆղանստանում:
Ինչպես կարծում են իրավապահները, հանցագործը միայնակ չի գործել և ունեցել է աջակից, որը լքել է դեպքի վայրն անմիջապես հանցագործությունից հետո: Նաև հայտնի է դարձել, որ Լոքները մոտեցել է հետևից, սկզբից կրակել կոնգրեսականի ուղղությամբ, ապա` մյուսների:
Զոհվածների թվում են Դաշնային դատարանի տարածքային դատավորը, Գիֆորդսի անձնակազմի անդամը և 9-ամյա մի աղջնակ:
Բացի այդ, լրագրողները սկսել են մեղադրել փոխնախագահի նախկին հանրապետական թեկնածու, Ալյասկա նահանգի նախկին ղեկավար Սառա Փեյլինին այս հանցագործությունը հրահրելու համար: Բանն այն է, որ Փեյլինը երկար ժամանակ իր բլոգում տեղադրել էր մի քարտեզ, որտեղ նշված էին այն նահանգների ներկայացուցիչների անունները, որոնց պետք է «գնդակահարել»` առողջապահական օրինագծին կողմ քվեարկելու համար: Այդ ցուցակում կար նաև Գաբրիել Գիֆորդսի անունը: Դեպքից անմիջապես հետո Փեյլինը հանել է այդ քարտեզը և հայտարարել, որ աղոթում է զոհվածների ընտանիքների և վիրավորների համար: