Հայաստանում ԱՄՆ դեսպան Ջոն Հեֆերնի գնահատականը, որ հրազդանյան ընտրությունները նորմալ են անցել և այնտեղ «կային երկու ուժեղ թեկնածուներ և իրական քաղաքական մրցակցություն», ամերիկյան մենթալիտետի տեսակետից լիովին հասկանալի է: «Առաջին լրատվական»-ի հետ զրույցում նման տեսակետ հայտնեց ՀԱԿ ներկայացուցիչ, ՀՀՇ վարչության անդամ Հովհաննես Իգիթյանը:
«Երբ Ջոն Հեֆերնին ասում էին ընտրակաշառքների մասին, նա այդ խոսակցություններին առանձնապես ուշադրություն չէր դարձնում: Այն, ինչ ամերիկացիները կարող են նորմալ համարել, մենք՝ հայերս, այնքան էլ միանշանակ չենք ընդունում: Եթե մենք նրանց ասենք, որ մարդկանց ընտրակաշառք է բաժանվել, ամերիկացիները միանգամից հարց կտան՝ արդյոք այդ մարդիկ գաղտնի քվեարկության հնարավորությո՞ւն են ունեցել: Եթե ասես այո, ամերիկացին միանգամից պատասխանում է՝ կապ չունի, քաղաքացին ընտրատեղամասում ինչ է ստացել: Այդ մարդուն ընտրակաշառք տվել են, թե չեն տվել, դա ԱՄՆ դեսպանի լիազորությունների մեջ չի մտնում, ոչ էլ նա կարող էր ստուգել դա: Սա, փաստորեն, ազգային մենթալիտետի հարց է, երբ ամերիկացիները չեն պատկերացնում՝ ինչպես կարող են պետական մարմինները ուղիղ շփման մեջ մտնել ընտրողների հետ և նրանց փող տալ: Մինչդեռ հարցին հայկական տեսանկյունից նայելիս տեսնում ենք, որ Հրազդանի քաղաքապետարանի աշխատակիցները գումարներով մտել են ընտրողների բնակարաններ՝ օգտագործելով վարչական ռեսուրսները, ներելով կոմունալ պարտքերը կամ նրանց ուղղակի գումար առաջարկելով: Ես ավելի հակված եմ նայելու հենց հայկական տեսանկյունից և հայտարարում եմ, որ Հրազդանում ազատ ու թափանցիկ ընտրություններ տեղի չեն ունեցել: Այնտեղ խորհրդարանական ընտրությունների մոդելի փորձ է կատարվել»,- ասաց Հովհաննես Իգիթյանը:
Անդրադառնալով Հայաստանում ԱՄՆ դեսպանի հարցազրույցի այն հատվածին, ուր նա խոսում է ԺՀՄԻԳ-ի կողմից Հայաստան ուղարկվելիք 250 դիտորդների մասին՝ ՀՀՇ վարչության անդամը նկատեց, որ վերջինիս հանգստությունը հասկանալի է: «Նա գտնում է, որ միջազգային դիտորդները ոչ թե պետք է ոստիկանի կամ մատ թափ տվող դեր կատարեն, կամ կասեցնեն ապօրինությունները, այլ ուղղակի դիտարկեն ընտրությունների ընթացքը, ինչի համար էլ 250 արտասահմանցու ներկայությունը լիովին բավարար է: Իմ տեսակետից, մինչդեռ, 4 հազար միջազգային դիտորդն էլ Հայաստանում քիչ են»,- ասաց Իգիթյանը:
Նշենք, որ «Ազատություն» ռադիոկայանին տված հարցազրույցում Հայաստանում ԱՄՆ դեսպան Ջոն Հեֆերնը նշել էր, որ Հրազդանի ընտրություններում կային երկու ուժեղ թեկնածուներ և իրական քաղաքական մրցակցություն: Առաջիկա ԱԺ ընտրություններին Հայաստան ուղարկվելիք միջազգային դիտորդների մասին խոսելիս էլ դեսպանը նշել էր, որ նրանք «բոլորն էլ շատ կարևոր են լինելու ազատ, արդար և արժանահավատ ընտրությունների կայացմանը նպաստելու հարցում»: