ՀՀԿ-ն ճակատամարտ մղող չէ, սակայն նորմալ է վերաբերվում ՀԱԿ-ի այն հայտարարությանը, թե ընտրությունների ժամանակ քաղաքական այդ ուժը պատրաստ է ընտրատեղամասերում ճակատամարտ տալ: Այսօր կայացած մամուլի ասուլիսի ժամանակ այս մասին հայտարարեց ՀՀԿ փոխնախագահ Գալուստ Սահակյանը:
Լրագրողներից մեկի հարցին` ինչո՞ւ քաղաքական դաշտում վերջերս չի երևում ԱԺ նախկին նախագահ Հովիկ Աբրահամյանը, և առհասարակ` ո՞ւր է նա, խորհրդարանականը պատասխանեց. «Շատ ուրախ եմ, որ նրա անձի հանդեպ կարոտ կա, բայց Հովիկ Աբրահամյանն առավոտից երեկո գտնվում է ՀՀԿ գրասենյակում, որը մեր կենտրոնական շտաբն է:
Իսկ այն խոսակցությունները, թե ՀՀԿ շտաբը երկու թևի է բաժանվել՝ Հովիկ Աբրահամյանի կողմնակիցների և առավել հնաբնակ ՀՀԿ-ականների, հավաստի չեն: Մի թևն էլ ինձ տաք, լրիվ կհամալրվի, ես որևէ մեկի ոչ թևում կարող եմ լինել, ոչ մեջքում: Ես ընդամենը կարող եմ կուսակցության աշխատանքները կոորդինացնել, կոնֆլիկտները հարթել»,- ասաց ՀՀԿ փոխնախագահը:
Նրա խոսքով՝ ԱԺ ընտրությունների ժամանակ յուրաքանչյուր կուսակցություն ինքը պիտի ապահովի իր ձայները: «ՀՀԿ-ն այնքան բարի չի լինելու, որ բուռ-բուռ բաժանի իր քվեները, իսկ թե ինչպիսին կլինի նոր խորհրդարանի որակը՝ մեծապես կախված է նրանից, թե ինչպիսի նախագծեր ու հայեցակարգեր կլինեն, ինչպես կաշխատի կառավարությունը և այլն»,- ասաց Սահակյանը:
Խոսելով սոցիոլոգիական հարցումների մասին` նա նշեց, որ ՀՀԿ-ն, իհարկե, ուշադրություն դարձնում է դրանց, սակայն առավել շատ վստահում է համայնքներում աշխատող իրենց կուսակիցներին, ովքեր էլ փոխանցում են նույն այդ համայնքների բնակիչների` ՀՀԿ հանդեպ տրամադրությունները:
Ամփոփելով` Գալուստ Սահակյանը նշեց, որ ինքը պոպուլիզմից դուրս մարդ է, և այդ պատճառով էլ շատ հաճախ հակասությունների մեջ է կնոջ, մամուլի հետ: «Ես քարոզիչ չեմ»,- նշեց պատգամավորը:
