ՀՀ արդարադատության նախարարության կողմից նոտար Մաժինյանի նկատմամբ հարուցված կարգապահական վարույթից հետո նույնիսկ Էրեբունի նոտարական տարածքի նոտար Սուրեն Մաժինյանը շարունակում է ապօրինի գործողություններ ձեռնարկել: Այս մասին «Առաջին լրատվական»-ին հայտնեց փաստաբան Տիգրան Մուրադյանը:
Բանն այն է, որ ՌԴ Կրասնոյարսկ քաղաքում մահացած Կորյուն Հարությունյանին պատկանող Երևան քաղաքի Բագրատունյաց 24 շենքի թիվ 58 բնակարանի վերաբերյալ Էրեբունի նոտարական տարածքի նոտար Սուրեն Մաժինյանի կողմից հանգուցյալի եղբորը` Սուրեն Հարությունյանին, այսինքն` երկրորդ հերթի ժառանգին, 04.02.2011 թ. տրվել է ըստ օրենքի ժառանգության վկայագիր: Մինչդեռ հանգուցյալ Կորյուն Հարությունյանն ունեցել է անչափահաս որդի` 1996 թ. ծնված Յուրի Հարությունյանը, որը հանդիսացել է առաջին հերթի ժառանգ և նրան պետք է անցներ իր հորը պատկանող բնակարանը: Նշվածի կապակցությամբ ՀՀ արդարադատության նախարարությունում նոտար Մաժինյանի նկատմամբ հարուցվել է կարգապահական վարույթ: Նոտարական գործողություն իրականացնելիս օրենքի խախտում թույլ տալու համար Սուրեն Մաժինյանը ենթարկվել է կարգապահական պատասխանատվության, քանի որ պարտավոր էր պարզել, սակայն չի պարզել` հանգուցյալն ունեցե՞լ է առաջին հերթի ժառանգ, թե՞ ոչ:
Փաստաբան Տիգրան Մուրադյանը, որը նաև անչափահաս ժառանգի ներկայացուցիչն է, անհազանգում է, որ անչափահաս Յուրի Հարությունյանին զրկելով ժառանգությունից, իսկ այնուհետև կարգապահական պատասխանատվության ենթարկվելով` Մաժինյանը չի խրատվել և շարունակում է իր սև գործը: Այժմ Շենգավիթ վարչական շրջանի ընդհանուր իրավասության դատարանում Մաժինյանը հանդես է գալիս նույն անչափահաս ժառանգի դեմ` փորձելով արդարացնել իր անգործությունը, որի համար ենթարկվել է կարգապահական պատասխանատվության: «Երևի կարգապահական տույժի միջոցն այն աստիճան է մեղմ եղել, որ նշանակություն չի ունեցել նրա համար: Նոտարիատի մասին օրենքը սահմանում է, որ նոտարն արդարադատության իրականացմանը նպաստող անձ է, որը հանդես է գալիս ՀՀ անունից, սակայն հենց ասվածից հետևում է, որ Մաժինյանը չի համապատասխանում այդ պահանջներին և գործում է դրան հակառակ»,- «Առաջին լրատվականին» հայտնեց փաստաբանը:
Փաստաբանի համոզմամբ` նոտար Մաժինյանի կողմից թույլ տրված օրենքի խախտումները և անգործության դրսևորումները մեկ նպատակ են հետապնդել` հարցերը լուծել այլ ճանապարհով, իսկ նմանատիպ դեպքերը, Տիգրան Մուրադյանի խոսքով, բնորոշ են միայն կոռուպցիոն ռիսկեր ունեցող համակարգերին: Փաստաբանն ընդգծեց, որ ՀՀ արդարադատության նախարարության կողմից Մաժինյանի նկատմամբ պատշաճ վերահսկողություն իրականացնելու և համարժեք տույժի միջոց կիրառելու դեպքում, իրավիճակն այդպիսին չէր լինի. որպես Հայաստանի Հանրապետության անունից հանդես եկող և արդարադատության իրականացմանը նպաստող անձ` Մաժինյանը նման վարքագիծ չէր դրսևորի և հանդես չէր գա անչափահաս ժառանգի դեմ: