Ինչպես փոխանցում է Al-Jazeera հեռուստաընկերությունը, այս գիշեր Չիլիի արտգործնախարար Ալֆրեդո Մորենոն հայտարարել է, որ իր երկիրը ճանաչում է Պաղեստինի ինքնավարությունը որպես անկախ պետություն` այն սահմաններում, որոնք գոյություն ունեին մինչև 1967թ.:
Ճանաչման այս հաղթարշավը դեռ անցնում է միայն Լատինական Ամերիկայով: Ինչպես «Առաջին լրատվականը» տեղեկացրել է, Պաղեստինի անկախության ճանաչումը սկսվեց Բրազիլիայից, ապա նրան հետևեցին Արգենտինան, Բոլիվիան և Էկվադորը: Պաղեստինի ներկայացուցչությունների ճանաչման մասին են հայտարարել եվրոպական որոշ երկրներ, ինչպես նաև Ղազախստանը:
Ենթադրվում է, որ Պաղեստինն անկախությունը կհռչակի այս տարվա օգոստոսին, թեպետ պաղեստինա-իսրայելական բանակցությունները մինչև այդ պահը դժվար ավարտված լինեն, և տարածքային խնդիրները Պաղեստինի և Իսրայելի միջև դեռ արդիական կլինեն երկկողմ հարաբերություններում ու կխոչընդոտեն խաղաղության վերջնական հաստատմանը տարածաշրջանում: Բացի այդ, հայտնի չէ, թե ինչ հակազդեցություն կլինի «Համաս» խմբավորման կողմից, որը վերահսկում է Պաղեստինի Գազայի հատվածը և չի ենթարկվում կենտրոնական իշխանություններին: