Ռուսական Интерфакс գործակալության փոխանցմամբ՝ Աբխազիայի նախագահ Ալեքսանդր Անկվաբի դեմ կատարված մահափորձի արդյունքում զոհվել է նրա թիկնապահներից մեկը, իսկ մյուսը գտնվում է ծանր վիճակում: Այս մասին հայտնել է Անկվաբի թիկնազորի պետ Անրի Բոգուան:
Այսօր առավոտյան՝ ժամը 08.25-ին, Գուդաուտայի շրջանում Անկվաբի ավտոշարասյան ճանապարհին պայթել է ղեկավարվող ֆուգաս: Պայթյունից հիմնականում տուժել են Անկվաբին ուղեկցող ավտոմեքենաները: Պայթյունից հետո հանցագործները նռնականետերով և գնդացիրներով կրակ են բացել Անկվաբի ավտոշարասյան ուղղությամբ:
Անկվաբն անձամբ չի տուժել, նա արդեն գտնվում է Սուխումի իր աշխատավայրում: Այժմ դեպքի վայրում աշխատում են փորձագետները, որոնք պետք է պարզեն պայթյունի ուժգնությունը:
Հիշեցնենք, որ սա Ալեքսանդր Անկվաբի դեմ 5-րդ մահափորձն էր, որը նախկինում վարել է Աբխազիայի վարչապետի ու փոխնախագահի պաշտոնները: 2 մահափորձ իրականացվել է 2005 թվականին, իսկ մեկական մահափորձ՝ 2007 և 2010 թվականներին:
Անկվաբն Աբխազիայի նախագահ է ընտրվել 2011 թվականի օգոստոսի 26-ին՝ նախագահական ընտրությունների առաջին փուլում հավաքելով քվեների 54.86 տոկոսը (58,657 քվե):