Եվրոպական միության և Հայաստանի միջև Խորը և համապարփակ ազատ առևտրի գոտու (ԽՀԱԱԳ) ստեղծման շուրջ բանակցությունների մեկնարկը հայտարարվեց, սակայն մինչ պայմանագրի կնքումը Հայաստանը դեռ շատ խնդիրներ ունի լուծելու: Ինչպես «Առաջին լրատվական»-ի հետ զրույցում նշեց ՀՀ-ում ԵՄ պատվիրակության ղեկավար Տրայան Խրիստեան, կան չափանիշներ, ոչ միայն հարկային, մաքսային այլև շատ տարբեր ոլորտներից՝ հեղինակային իրավունքի պաշտպանություն, բուսասանիտարական չափանիշներ, թե՛ սակագնային, թե՛ տեխնիկական, որոնց ՀՀ-ն պետք է բավարարի:
«Ավելի խորացված բարեփոխումներ են պահանջվում, որոնք եթե հասցվեն ավարտին, կնպաստեն ՀՀ տնտեսության մրցակցության և երկրի մրցունակության բարձրացմանը»,- ասաց Տ. Խրիստեան:
Նրա գնահատականով՝ ՀՀ տնտեսական ցուցանիշները բավականին տպավորիչ են, քանի որ համաշխարհային ճգնաժամի ժամանակ 4%-ից ավելի աճ ունենալը բավականին լավ է: Օրինակ՝ Եվրոպայում աճը 0.3-1.5% է եղել: Սակայն, հաշվի առնելով, որ այս աճը բավականին մեծ անկումից հետո է, ապա արդյո՞ք կայուն աճ կարելի է անվանել, թե՞ ոչ: Ըստ Տ. Խրիստեայի՝ սա պետք է տնտեսագետները գնահատեն: «Ամեն դեպքում, դա լավ ցուցանիշ է, որպեսզի մեր պայմանագիրը, որ նախատեսվում է, տնտեսական բազա ունենա: Սա լավ մեկնարկ է, որը պետք է շարունակել, որպեսզի այն կայուն դառնա: Առևտրի համաձայնագիրը նոր մոտեցում է և կաջակցի բարեփոխումների վերակառուցմանը: Դրա արդյունքում տնտեսական միջավայրն ավելի կանխատեսելի պետք է դառնա»,- նշեց Տ. Խրիստեան`հավելելով, որ ԵՄ հետ ՀՀ-ի ինտեգրման գործընթացն ավելի շատ կախված է օրենսդրական բարեփոխումներից:
Միաժամանակ, Տ. Խրիստեան խուսափեց գնահատել ՀՀ-ում հարկային և մաքսային ոլորտում ներկայիս իրավիճակը. «Չեմ կարող գնահատական տալ, քանի որ դեռ կարճ ժամանակ է, ինչ գտնվում եմ ՀՀ-ում: Հարկավոր ուսումնասիրել փաստաթղթերը, վիճակագրությունը և այլն»:
