2011 թ. բանկային համակարգի համար հաջող տարի էր: Այսօր լրագրողների հետ հանդիպման ժամանակ նման գնահատական տվեց Հայաստանի բանկերի միության նախագահ Աշոտ Օսիպյանը: Նրա ներկայացրած տվյալների համաձայն` համակարգի կապիտալն աճել է 44.8 մլրդ դրամով կամ 14%-ով` կազմելով 375 մլրդ դրամ, ակտիվներն ավելացել են 506.6 մլրդով կամ 32.3%-ով` գերազանցելով 2 մլրդ ցուցանիշը, վարկային ներդրումներն աճել են 34%-ով` կազմելով 1 մլրդ 337 մլն դրամ: Ոլորտի եկամտաբերությունը կազմել է 12%, ակտիվներինը` 2.36%:
Նա հայտնեց, որ տնտեսության վարկավորման աճի տեմպերը (44.3%) գերազանցում են ֆիզիկական անձանց աճի տեմպերին (22.5%): Բանկերը 32 մասնաճյուղերով ավելացրել են իրենց ցանցը, ինչն, ըստ Ա. Օսիպյանի, նշանակում է, որ առևտրային վարկային գործունեությունը շահավետ է: Համակարգի վճարած հարկերը 2011-ին աճել են 1.7 անգամ: Անցած տարի 6-7 բանկ են ներգրավված եղել գյուղոլորտի վարկավորման մեջ, այս տարի ենթադրվում է, որ 8 բանկ կներգրավվի:
«2011թ. համար ռիսկերի կառավարումը գլխավոր խնդիրն էր»,- ասաց Ա. Օսիպյանը` նշելով, որ դրա մեջ մտնում է սթրես-թեստերի անցկացումը և այլն:
Ըստ Ա.Օսիպյանի` այսօր համակարգի կայունությունը թիվ մեկ խնդիրն է: Նա վստահեցրեց որ մեզ չի սպասվում նույն սցենարը, որ տեղի էր ունեցել 2009թ.-ին, և դրամի պահվածքը որոշակիորեն կանխատեսելի է:
ԱՄՆ-ում ՀՀ բանկային համակարգի ներկայացումը նա «հաջող» որակեց և հայտնեց, որ կշարունակեն գործընթացը նաև այլ երկրներում:
