Ադրբեջանցի երիտասարդ ֆուտբոլիստ Արազ Աբդուլաևը պայմանագիր է կնքել անգլիական «Էվերտոն»-ի հետ,- հաղորդում է «azerisport.com»-ը: «Էվերտոն»-ի ներկայացուցիչ Դեվիդ Հարիսոնը, որը 18-ամյա ֆուտբոլիստի տեղափոխության հարցերը լուծելու համար ժամանել էր Բաքու, մամուլի ասուլիսի ընթացքում ասել է, որ պայմանագիրը երկարաժամկետ է: «Կոնկրետ ժամկետներ չեմ կարող հայտնել, բայց սա երկարաժամկետ պայմանագիր է: Մենք հետևել ենք Արազ Աբդուլաևի խաղին մեկ տարի առաջ կայացած՝ մինչև 21 տարեկանների Շոտլանդիա-Ադրբեջան հանդիպման ժամանակ և նա մեզ դուր է եկել: Մենք ցանկանում ենք Արազին տեսնել մեր թիմում»: Երիտասարդ ֆուտբոլիստը, չթաքցնելով ոգևորությունը, հայտարարել է. «Երջանիկ եմ, որ կլինեմ առաջին ադրբեջանցին, ով հանդես կգա անգլիական Պրեմիեր լիգայում, բայց մինչ այդ ցանկանում եմ չեմպիոն դառնալ «Նեֆչի»-ի հետ»:
«Football.ua»-ից տեղեկանում ենք, որ իտալական «Յուվենտուս»-ը շատ արագ փոխարինող գտավ վնասվածք ստացած Կվալյարելլայի համար, որը չի խաղա մինչև մրցաշրջանի ավարտը: Թուրինցիներն արդեն համաձայնության են եկել «Ջենոա»-ի հետ, և այսօր իտալացի անվանի ռմբարկու Տոնին բուժզննում է անցնում «Յուվենտուս»-ի մարզաբազայում, որից հետո ակումբի հետ պայմանագիր կկնքի մինչև 2012 թվականի հունիսը:
Գերմանական «Հոֆենհայմ»-ը ցանկանում է ձեռք բերել «Լիվերպուլ»-ի հոլանդացի հարձակվող Ռայան Բաբելին: «Հոֆենհայմ»-ի և «Լիվերպուլ»-ի ներկայացուցիչները մոտ օրերս հոլանդացու տեղափոխության հարցը կքննարկեն Իսպանիայում, որտեղ այժմ ուսումնամարզական հավաք է անցկացնում գերմանական ակումբը: