Ամերիկյան բարձրաստիճան զինվորականները կասկածում են, որ Իսրայելը կկարողանա արդյունավետ հարված հասցնել իրանական միջուկային օբյեկտներին, եթե երկրի ղեկավարությունն, այնուամենայնիվ, գնա այդ քայլին: Այս մասին գրում է NEWSru Israel–ը՝ հղում անելով The New York Times-ին:
Հրատարակությունը հղում է անում ԱՄՆ բանակի գեներալ-լեյտենանտ Դեյվիդ Դեպտալի կարծիքին, ով նախագծել և իրագործել էր ամերիկյան ռազմաօդային ուժերի օպերացիաները 1991 թվականին Պարսից ծոցի և 2001 թվականին Աֆղանստանի պատերազմների ժամանակ:
Մասնավորապես, Պենտագոնի հաշվետվության մեջ նշվում է, որ օդից իրանական միջուկային օբյեկտներին հարվածելու համար առնվազն 100 իսրայելական ինքնաթիռ ստիպված կլինեն հաղթահարել մոտ մեկուկես հազար կմ ոչ բարեկամական երկրների տարածքով, օդում վերալիցքավորում իրականացնել, հաղթահարել Իրանի հակահրթիռային պաշտպանությունը և միաժամանակ ռմբակոծել բազմաթիվ ռեակտորներ, որոնցից մի քանիսը գտնվում են գետնի տակ:
Ինչպես գրում է NEWSru Israel-ը, բոլորովին վերջերս Իսրայելում էր ԱՄՆ-ի նախագահի անվտանգության հարցերով խորհրդական Թոմ Դոնիլոն: Տեղական ԶԼՄ-ների վարկածով՝ այս այցը վկայում է այն մասին, որ Թեհրանի վրա ռազմական հարձակումն ավելի ու ավելի իրական է դառնում:
Ավելի վաղ տեղեկացնում էին, որ «Մոսսադ» իսրայելական հետախուզության ղեկավար Թամիր Պարդոն վերջերս ԱՄՆ կատարած իր այցելության ժամանակ պարզել էր, թե ինչպես կարձագանքի Վաշինգտոնն իսրայելցիների կողմից Իրանին ռազմական հարձակման ենթարկելուն: Մասնավորապես, ԱՄՆ–ը կմասնակցի՞ արդյոք այդ օպերացիային:
